Dimapur, Lber:
U Symbud Myntri Rangbah jong ka Nagaland, u Y Patton, ha ka sngi Ba-ar, u la pynpaw ïa ka jingsngewkhia halor ka jingshah lehbeiñ jaitbynriew kaba ju jia man ka por ïa ki paidbah ka thaiñ Shatei-lam-Mihngi ha Delhi.
“Nga sngew shyrkhei bad sngewkhia ïa ki jingjia ba ïai jia biang jong ka jingshah lehbeiñ jaitbynriew pyrshah ïa ki briew na Northeast India,” ong u Patton ha ka kyrwoh, da kaba kylli “lano ngin nang ban ïohi shwa iwei ïa iwei pat kum ki nong India”.
Haba pynrem jur ïa ka jingshah lehbeiñ jaitbynriew bad ka jingkynnoh thombor pyrshah ïa arngut ki nongshong shnong ka Northeast hajan ka ïingbishar jong ka Saket District Court Complex ha New Delhi ha ka 8 tarik u Lber, u la ong ba kum kine ki kam lehbeiñ bad leh shilliang khmat kim dei tang kiba pynmynsaw hynrei ki ïaid pyrshah ruh ïa ki jinglong jong ka jingïatylli bad ka jingtehsong kaba ka ri jong ngi ka ïeng na ka bynta jong ka.
U la ong ba ka long kaba pynduh mynsiem ban ïohi ba ki briew ki shah bishar ne shah lehbeiñ katkum ka dur ka dar, ka jaitbynriew, ne ka jaka ba ki wan.
“To ngin ïawan lang ban kyntiew ïa ka jingsngewthuh jingmut, ka jingsngewrit bad ka jingburom ïa baroh ki kolshor bad ki jaitbynriew”, la kyntu u Patton.U la ban jur ba uwei pa uwei u nong India u dei hok ban ïoh ïa ka jingleh burom, khlem da kheiñ ïa ka tynrai jong u.
“Ngi dei ban rakhe ïa ka jingpher jong ngi bad ithuh ïa ka bor kaba ka wanrah ïa ka jaitbynriew jong ngi bad kyntiew ïa ka jinglong ba kynthup lang,” u la ong.U Patton u la kyntu ïa baroh ban ïeng pyrshah ïa ka jingsngewpher jaitbynriew bad kyntiew ïa ka jinglong ba kynthup lang ha baroh ki liang jong ka jingim.
“To ngin tei ïa ka imlang sahlang ha kaba baroh ki sngew ba ki don dor, burom bad shngaiñ,” u la ong bad bynrap ba ka jingsngewpher jaitbynriew bad ka jingleh donbor ki long ki bym lah ban pdiang satia bad ki dei hok ban ïoh ïa ki jingpynshitom kiba tyngeh katkum ka aiñ.
