Shillong, Lber 12
U Myntri ba dei khmih ïa ka tnad Food Civil Supplies and Consumer Affairs u Bah Methodius Dkhar u la pynthikna ba ka Jylla ka pahuh ka jingdon ki tyndong lyer shet (Cylinder) bad ka Sorkar kan leh da kaba tyngeh pyrshah ïa kino-kino kiba die tuh, pynkiew dor bad buh rieh ïa ki Cylinder wat haba ki heh Sorkar ha Garo Hills ki dang ïaleh ban pynphai biang ïa ki jingpynpoi marbam bad ki mar mata ba donkam hadien ba mih ka jingïakynad.
“Haduh mynta ngi pahuh ka mar bad ka Sorkar ka la pyntreikam ïa ka State Level Committee hapoh ka jingïalam jong u Chief Secretary ban buddien ïa ka jingdon ki tyndong lyer shet LPG Cylinder bad ka jingsam man la ka sngi” la ong u Bah Methodius hadien ba u la pynlong ïa ka jingïalang bishar bniah.
“Ka jingpynbiang tyndong lyer shet (LPG Cylinder) hapoh ka ri na ka bynta ki longïing ka dang long kaba hakhmat eh bad nga kwah ban kyrpad sha baroh ki nong shong shnong ba kan nym don kano-kano ka daw jong ka jingsyier ha ki nongthied” u la ong haba pyntip ba la buh hakhmat eh ruh ban pynthikna ban pynpoi sha ki jaka ba kongsan kum ki hospital, ki hostel bad ki anganwadi centre. U Myntri u la maham ruh ba ka jingthied palat pud ne ka jingkhaïi sha kiwei pat ki jaka ïa ki Cylinder kan wanrah ïa ka jingshah pynshitom katkum ka aiñ Essential Commodities Act bad u la kyntu ïa ki longïing ba kim dei ban don ka jingsyier ban duh Cylinder.
“Yn shim bad pyntreikam da ki kyndon kiba tyngeh pyrshah ïa ka jingthied palat pud, ne ka jingdie ha ka dor kaba rem ïa ki tyndong LPG Cylinder katkum ka aiñ Essential Commodities Act” u la ong.
Na ka liang u President ka Khasi-Pnar Gas Agency u Bah RL Blah u la ïathuh ba ka dor tyndong lyer shet (Cylinder) kaba khia kaba dei 14.2kg kadei T.1,005 kata (T.980+T.25 ka bai kit) bad u la ong ba ka jingdon ki tyndong lyer shet hapoh ka Jylla Meghalaya ka la biang haduh ka 21 tarik u Lber. U Bah Blah u ïathuh ruh ba ka Sorkar ka la pynbiang bor pahara ban bud ïa ki kali kit tyndong lyer shet (Cylinder) ban pynpoi sha Garo Hills bad la wan kit ruh ïa ki Cylinder kiba heh 19kg ban pynpoi sha ki Home Stay, Hostel, Hospital bad ki jaka ba kongsan.
