Beijing, Lber:
Katkum ki khubor, la ong ba ka China bad ka North Korea, ha ka Sngi Palei kin sdang ban pyntreikam biang ia ki rel ki ban leit ban wan na kitei ki ri, ia kiba la ngeit ruh ba kan sdang treikam noh naduh ka Sngi Palei, hadien 6 snem ba la pynsangeh noh ia ka jingpyntreikam ha u snem 2020 naduh ba wan ka khlam Covid-19.
Kane ka jingshakri kan plie ïa ki briew na China kiba trei bad pule ha North Korea, kumjuh ruh ïa ki nong Korea North Korea kiba trei, kiba pule bad kiba leit jngoh ïa ki bahaïing hasem shabar ri, la ong ka tnat ka leit- ka wan haba iadei bad ka jingdie ia ki tiket ba tikna ha Beijing bad ha Dandong.
Watla katta, la ong ba ki nongjngohkai pyrthei kin ym pat lah ban thied ia kitei ki tiket ia mynta shipor.
“Ka long kaba sngewtynnad ban iohi ba ka jingshakri jong ki rel pyrthei kan sdang biang”, la ong u Rowan Beard, uba dei u nongkhmih ia ka leit ka wan bad ka kam jngohkai pyrthei jong ka Young Pioneer Tours.
U la pyntikna ba ka kompeni jong u, kawei na ki katto- katne ki kompeni kiba tbit bha ha ka leit ka wan sha North Korea, kan lah ruh ban book tiket, kaba sdang naduh ka Sngi Thursday.
“Watla ha kaba sdang kam shym la thmu na ka bynta ki nongjngohkai pyrthei, hynrei kan ai sa kawei pat ka lad ban leit jingleit shisien ba ka jingleit jngohkai pyrthei sha North Korea kan wanphai biang ha kaba kut, kaba shakri kum ka lad ban ïaid liengsuiñ.”
Ka jingleit jingwan jong ki rel hapdeng kine ki ar tylli ki ri ka la sangeh noh ha u snem 2020 namar ba ki la pynjari ïa ki kyndon kiba tyngeh pyrshah ïa ka jingsaphriang jong ka khlam Covid-19.
Ha u snem ba ladep, ki liengsuiñ bad ki rel ki la sdang treikam biang hapdeng ka North Korea bad ka Russia, namar ba kine ki artylli ki la ïajan bha naduh ba la sdang ka thma ha Ukraine.
