Shillong, Lber 12
Ka State Bharatiya Janata Party (BJP), ka la ong ba ka “ïeng ha syndah” bad ki jaidbynriew ‘riewlum bad ka dawa ba ym dei ban shah ïa kino-kino ki “nongwan rung be-aiñ” ban ïakhun ha ka ilekshon sha ka Garo Hills Autonomous District Council (GHADC).
Ha ka kyrwoh khubor, u State President ka BJP, u Rikman G. Momin u la pynpaw ka jingsngewkhia kaba khraw halor ka jingkulmar ha Chibinang, Tura bad kiwei-kiwei ki jaka ha ka 9-10 tarik Lber bad kyntu ba dei ban pynneh-pynsah ïa ka shong suk shongsaiñ.
U la ong ba ka BJP ka kwah ban pynpaw shai ïa ka nongrim jong ka ba “ym dei ban shah ïa uno-uno u nongwan rung be-aiñ ban ïakhun ha ka ilekshon jong ka GHADC”.
“Ka GHADC ka dei ka shnat treikam ba la pynkha hapoh ka Khyrnit kaba 6 jong ka Riti Synshar jong ngi ban ïada ïa ki hok bad ka synshar-khadar (da lade ïalade) jong ki jaidbynriew trai-ri trai-muluk ba dei ki ‘riewlum. Ïa kata ka jingïada dei ban pynneh-pynsah,” la ong u Momin da kaba bynrap, “La ka long ka ilekshon sha ka Tribal Autonomous District Council, ka Ïingdorbar Thawaiñ ka Jylla ne ka ilekshon sha ka Ïingdorbar Parliament, ym dei ban shah ïa kiba wan rung be-aiñ ban wan bsuh khlieh ha kino-kino na kine ki rukom synshar paidbah, ha kano-kano ka jaka ha ri India.”
Ka seng ka la maham ïa ka “jinglong kaba pynkhuslai jingmut” ha ki jaka jong ka Tribal Council. U Momin u la ñiew ïa kane “ym ka jingwan buhai shnong” hynrei ka jingpynkylla kaba ryntih ïa ka snap kyrpang, ïa ki hok jong ki ‘riewlum, bad ïa ka rukom jied nongmihkhmat.
“Ki nongwan rung be-aiñ ki shongkurim ïa ki jaidbynriew trai-ri, bad lyngba kine ki jingshongkha, ki ïoh ïa ki jait jong ki ryngkat kiwei-kiwei ki kot ki sla kum ki ‘Aadhaar’, ki ‘ID’ nongthep ‘vote’, ki ‘card’ rashon, bad ki pyrshang ban pyni ïalade kum ki nongshong shnong kiba dei hok. Kane ka pynlah ruh ïa ki ban ïoh ïa ki jaka ki puta ha kata ka jaka. Kane kam dei ka jingbuhai shnong. Ka dei ka jingpynkylla kaba ryntih ïa ka snap kyrpang, ïa ki hok jong ki ‘riewlum, bad ïa ka rukom jied nongmihkhmat jong ngi,” u la ong haba dawa ba dei ban thaw ïa ki aiñ kiba pyrkhing tam pyrshah ïa kane ka bynta ha ka por kaba kloi eh.
“Ha ki por ban wan, kane ka aiñ kan pynneh-pynsah ïa ki jaka ki puta jong ki, bad ki briew jong ka jaidbynriew Garo na ki nongwan rung be-aiñ kiba suki-suki ki sdang ban knieh ïa ki jingdon-jingem mariang, ki jaka-puta bad ïa ki briew lyngba ka jingïashongkha. Kito kiba rung be-aiñ sha ka ri jong ngi bad kiba pyrshang ban tuklar ïa ka ilekshon bad jingsynshar jong ngi ki dei ban mad ïa ka bor ba tyngeh jong ka aiñ,” ong u Momin.
Shuh shuh u President u la kular ba ka Sorkar Pdeng ka long la kloi ban ïarap ïa ka Sorkar Jylla ban wanrah biang ïa ka suk ka saiñ ha baroh kawei ka Ri-lum Garo.
“Ki paidbah ka Thain Shatei Lam Mihngi ki dei hok ban ïoh ïa kaba kham bha. Ki jaidbynriew ‘riewlum ka Ri-lum Garo ki dei hok ban ïoh ïa ka jingïada kaba ka Riti Synshar ka kular sha ki,” u la ong.
