Washington, Lber:
U President ka US, u Donald Trump, ha kane ka kynti u la byrngem ba un ai jingkyrshan ia ka jingbuh thong jong ka Israel ban pyniap sa ia u nongialam ba thymmai jong ka Iran- u Mojtaba Khamenei, lada utei u nongialam um treh ban iatreilang bad ka US, halor ki jingdawa jong ka US.
Ki jingdawa kiba bun ki kynthup ïa ka jingdawa jong ka US ba ka Iran ka dei ban sangeh noh ïa ka prokram shna tiar nuclear jongka, ha kaba u Trump u long uba la pynkhreh ban pynduh noh ïa une u nongïalam ba dang shu thung thymmai lada u kyntait.
Ki heh jong ka US, ki la ong ba katei ka jingkhynra, ka lah ban long kaba la ialam da ki shipai Israel, kaba iadei bad katei ka jingkhynra, kaba la pyniap ia u kpa jongu, ha ka 28tarik u Rymphang.
U Trump, ula pynpaw ia ka jingbym iahap kaba jur, hadien ba ka Iran, ka la jied ia u khun ba ar jong U Ali Khamenei, kum u nongialam ba thymmai. U la ong ba u nongialam ba thymmai jong ka Iran, u Mojtaba Khamenei, un nym lah ban “im ha ka jingsuk”.
