Shillong, Lber 13
Hadien ba la mih ka resol thoh exam jong ka District Selection Committee (DSC) East Khasi Hills District, kaba la mih ar sien u juh u number, ka la pynlong ïa ka Voice of the People Party (VPP) Youth Wing ban leit ïakynduh ïa u Member Secretary ka DSC ban pan jingshai halor kane ka jingthurmur ban pynmih ïa kane ka resol ha ka kam Peon.
Ïa kane ka exam kam Peon ha DSC la pynlong myn ha ka 07 u Lber 2026, bad ka District Selection Committee ka la pynmih noh hynnin ka sngi ïa ka resol jong ki samla kiba pass ha kane ka kam.
Haba kren sha ki lad pathai khubor u Bah Marbud Dkhar, President ka VPP Youth Wing u la pynpaw ïa ka jingbym sngewïahap halor ka jingpynmih ïa ka resol thungkam thungjam jong ka DSC, kam Peon ha EKH namar ba ujuh u number u mih ar sien.
“Ngi la kylli na u Member Secretary ka DSC ba balei u number u mih haduh ar sien, bad hato u wei u briew u lah ban ïoh ar tylli ki kam. Kane ka la pynkyndit ïa ka seng bad sngewkhia ba kum kine ki kam ki ju wan jia na ka por sha ka por,” u la ong.
U la ong ba na ka liang u Member Secretary ka DSC u la pyntip ba kane dei ka jingbakla jong u briew namar ba ïa ki paper la leh beit da ka OMR Sheet bad ka sa mih ka jingbakla ha ka jingpynmih ïa ka resol.
Haba ïadei bad ka rukom thungkam thungjam hapoh DSC, u Bah Marbud u la ong ba kam shym long kaba shai bad kam long kaba khuid ba suba. Kane ka rukom pynmih ïa ka resol ruh ka pynsuba ïa ka VPP, da kaba kynnoh ruh ba ka jingpynrung kam, kiba ïoh kin dei beit kiba ithuh ithaw bad ki heh ki haiñ bad kiba lah ban thong da ka pisa kumba 10 ne 15 Lak tyngka.
U la ong ba halor kane ka jingleh thurmur jong ka DSC ban pynmih ïa ka resol thungkam thungjam, na ka liang ka seng kam sngewïahap.
Namarkata, u Bah Marbud u la dawa ruh ba ka District Selection Committee haba ka pynmih ïa ka resol ka dei ban pynmih ïa u Roll.No, ki marks ym ban shu pynmih tang ka kyrteng, khnang ba kan long kaba shai.
“Ngi kyntu ruh ïa ka ophis jong ka DC ba ka dei ban buh ka por ba kylluid ban thoh ïa ki exam kam jong ki samla namar kiba bun ki samla wad kam wad jam ki la duh noh ban ïakhun ïa ka exam tang namar ba lyngkot palat ka por. Ngi dawa ba ïa ka por phin buh kloi ban long bad ïa ka resol ruh ka dei ban pynmih kloi ym ban slem namar ka ktah ïa ki samla wad kam wad jam,” la bynrap u Bah Marbud.
Shuh shuh u la ong ruh ba ka VPP ka la dawa ba ka ophis jong ka DC ka dei ban buh ha man la ki jaka ban thoh exam ym tang ha Shillong, khnang ba ki samla thoh exam kin ïoh beit ban thoh ha ki jaka ba long jan bad ban suk ka leit ka wan bad ka por ruh kan kylluid.
Ka VPP kam pat hun halor kane ka jingïakynduh bad u Member Secretary ka DSC, da kaba dawa ruh ïa ka Deputy Commissioner ka EKH ban pynshai mardor halor kane ka jingthurmur palat ban pynmih ïa ka resol.
