Shillong, Lber 13
U Superintendent of Police ka East Khasi Hills District u Bah Vivek Syiem, u la ïathuh ba la ïoh ban kem noh ïa ki 6 ngut ki briew ba la suba donkti ban pynpait bad rongtuh ïa ka pisa ba palat T. 98 lak na lai tylli ki ATM ba la jia ha East Khasi Hills District.
U Bah Vivek haba kren sha ki nongthoh khubor u la ïathuh ba ka kynhun kyrpang ki pulit ki la lapdien bad ïoh kem ïa u Salim (26 snem) bad ïa u Rahul (31 snem) ha ka 10 tarik Lber ha nongbah Nuh kaba hap ha ka District Nuh jong ka Jylla Haryana. Hadien kane la kem sa ïa arngut ki Khasi kiba dei ki nongïarap ba na Shillong kiba kynthup u John Fiscal Lyngkhoi (32 snem) ba sah ha Umpling bad u Joyous Dura (47 snem) ba sah ha Mawlai Nongkwar, nalor kine la kem ruh ïa u Rejaul Korim (38 snem) bad ïa u Lius Ali (28 snem) kiba na ka Jylla Assam.
Kine ki jingjia ba shah prong tuh ATM ki kynthup ïa ka jingjia ba la jia ha ka 21 tarik Jymmang 2025 ha Mawkriah ha kaba ki runar ki la rongtuh ïa ka pisa T. 28, 13,100, ha ka 30 tarik u Nohprah 2025 ha Smit kaba ki runar ki la rongtuh ïa ka pisa T. 35,57,000 bad ka jingjia ba dang shen ha 8 tarik u Rymphang 2026 ha Mylliem, ha kaba ki runar ki la rongtuh ïa ka pisa palat 35 lak tyngka.
U Bah Vivek u la pyntip ba ïa kitei ki jingjia ki pulit ki la register case 2 tylli ha Mawngap Police Station bad kawei ha Madanryting Police Station hapoh ki kyndon aiñ bapher-bapher jong ka BNS.
U Bah Vivek u la ong ba kine kiba donkti ban pynpait ïa ki ATM ha kitei ki thaiñ, ki dei kiba la tbit bha ha kane ka kam tuh ha kaba tang hapoh ka 7 minit ki la lah ban sei bad rongtuh ïa ka pisa “Ngim pat ju ïohi ïa kum kine ki runar kiba tbit ban lute sted ïa ki ATM”, u la ong.
“Kine ki briew ki dei kiba la shah thwet ha kiba bun ki kam kyndang ATM ha ka ri,” ong u Bah Vivek haba pyntip ba ka ïingkashari ka la aibor ban set san sngi hapoh ka Police Custody ïa u Salim bad Rahul katba hynriew sngi ïa u John bad u Joyous.
U Bah Vivek u la pyntip ba ka jingtohkit ka dang bun bad ka jingthwet ka dang ïaid mynta ban kem shuh-shuh ïa kiwei ki runar kiba la dang phet rieh.
Haba kylli, u Bah Vivek u la ïathuh ba ki arngut kiba kem na Shillong ki dei ki nongïalam lynti bad ki dei ruh kiba ju donkti ha kiba bun ki kam bymman ha ki por ba la leit noh bad kine ki arrngut ki dei ruh kiba la donkti teng ha ki kam khaïi drok, pynïap briew bad kiwei ki kam sniew.
Haba kylli la u Joyous Dura u dei uba don jingïadei bad uwei u nongthaw aiñ ka Jylla, u Bah Vivek ula jubab “Ngam tip ïa kata. Ïano ba ki don jingïadei bad kane ka bynta kam dei ki bynta jong ka jingtohkit”.
Kum ban shu kdew hangne, ki paidbah ba don kumba 30 ngut ki la thombor ïa ki Pulit ka Jylla da kaba pyrshang ban pynlait ïa u Rahul ha Nuh District, kaba la pynbor ïa ki Pulit ban siat da ka suloi bad kaba la jia ha ka 10 tarik Lber 2026.
U Bah Vivek u la pyntip, haba ïadei kane ka jingjia ba ki Pulit ka Haryana ki la register case bad dep ithuh ïa 12 ngut na kine ki nongthombor bad bynrap ba ki nongtohkit kim shym la lap ïa ka jingdonkti ki nongtrei Bank ha ki jingshah kyndang kine ki ATM.
