Shillong, Lber 13
U lahduh ha ka jinglehkai kawang sum (javelin throw) jong ki paralympic u Sumit Antil u la pynpaw biang ïa ka bor kaba radbah ha ka liang ka jingïakop ha ka pyrthei, da kaba u la ïoh khur takma ksiar ha ka jingïakhun jong ka kyrdan men’s javelin throw ha ka F43/F44/F64 jong ka World Para Athletics Grand Prix 2026 kaba long ha New Delhi.
U Antil, uba la long u nongrah ïa ka kyrdan kaba hakhlieh tam ha kane ka jingïakhun, u la jop da ka jinglah ban kawang kaba poi haduh 69.25 meter. Kane ka jingjop jong u ka la long ka khubor kaba sngewtynnad bha na ka bynta ka kynhun ki nongïalehkai ka India, kiba la ïoh ban rah bun ki takma ha ki bynta bapher-bapher jong ka lympung.
Watla u la long u nonglehkai uba la paw nam ha ka pyrthei, u samla ba 27 snem ka rta na Sonipat, Haryana, u la ïathuh ba ka jingjop jong u ka la palat ïa ka jingkhmih lynti jong u hi.
“Kane ka long ka por ba nga dang pynkhreh (off-season loading phase),” u Antil u la ong hadien ka jinglehkai. “Nga khmih lynti tang kumba 67-68 meter, hynrei ka la poi haduh 69.25 meter. Kumta nga sngewhun, bad ka kynhun jong nga ruh ki sngewhun.” Watla ka thong bad ka jingthmu jong u kadei ban poi haduh 75 meter
U Antil, uba la ïoh ar sien ïa ka takma ksiar ha ka Paralympic, u la buh mynta ïa ka thong kaba kham heh ha ka jingïakhun Asian Para Games ka ban long ha Japan.
Kane ka long ka sngi ka jingjop na ka bynta ka India, ha kaba ki jingïalehkai ha Jawaharlal Nehru Stadium ka la long ka dak jong ka jingkiew ka kyrdan ka India ha ka liang ka para-athletics. Ha ka javelin throw, baroh lai ngut kiba ïoh khur takma ki dei na ka ri India, ha kaba u Pushpendra Singh u la ïoh ïa ka takma rupa (56.91m) bad u Poonam Ram u la ïoh ïa ka takma tama (49.48m).
Ka jingjop ka la pur sha kiwei de ki bynta, kaba pynpaw ba ka ri India ka la long kawei na ki ri kaba donbor bha ha kine ki jait jingïalehkai.
