Hyderabad, Lber:
Kum shi bynta ban pynthikna ba kito kiba aiti ïa ki jaka bad ki jingdon jingem jong ki na ka bynta ka projek pynroi ïa ka Wah Musi kin ïoh ïa ka bai lutksan kaba hok, u Myntri Rangbah ka Jylla A Revanth Reddy ha ka lah sngi U Blei u la kyrpad ïa ki briew kiba sah hapoh ka Buffer Zone jong ka wah ba kin ai ka jingïatreilang na ka bynta ka jingbit jingbiang jong ki pateng ban wan.
Haba kren hadien ba la plie ïa ka Nalla Cheruvu ba la pynthymmai bad pynroi thymmai ha Kukatpally, u la ong, “Lada ngim pynthymmai ïa ka wah Musi ki pateng ban wan kin ym map ïa ngi.
Katba ïa ka Sabarmati Riverfront project la shim ha Ahmedabad, ïa ka jingpynkhuid ïa ka Yamuna la shim ha Delhi bad ïa ka jingpynthymmai ïa ka Ganga ha Uttar Pradesh, balei ngim dei ban shim ïa ka projek Musi? Ka sorkar jong ngi kan ai bai lutksan bad ai ïing ïa ki briew kiba duh ïa ki jaka puta jong ki. Nga khot ïa ki briew ban ïatreilang na ka bynta ka jingpynheh surok, ka projek Musi bad ka jingshna ïa ki surok.”
