Shillong, Lber 13
Ka MLA jong ka 16-East Shillong Constituency ka Dr. M Ampareen Lyngdoh ka la ong ba ka la mih ka jingïakren, la ka kwah ne em ban ïakhun ïa ka ilekshon MP shiteng samoi na Shillong Parliamentary Seat.
Haba kren sha ki lad pathai khubor ha ka sngi Thohdieng ka Kong Ampareen haba ïadei bad kane ka la ong ba ïa ka rai ban pynïeng kyrtong na ka bynta ka ilekshon MP ka shong ha ka rai jong ka Party, ïano ka ibit ban pynïakhun.
Ka Dr. Ampareen ka la ong “Ka Party kan rai haba ïadei bad u/ka kyrtong bad ka Party kan hap ban ïoh jingmynjur na u/ka kyrtong ha shuwa ban pynbna paidbah ïa ka kyrteng.”
Ka la ong, la kan ïakhun ne em ha ka ilekshon MP shiteng samoi, ïa kata hap ban shim rai da ka Party.
Ka Kong Ampareen ka la ong ba nalor ka ilekshon MP shiteng samoi, ka Party kan hap ruh ban pyrkhat haba ïadei bad ka jingpynkhreh jong ka Party na ka bynta ka ilekshon MLA 2028.
Haba bynrap ka la pynpaw ba ka kwah ban lait na ka jingshah bate kam haba ïadei bad ka ilekshon MP shiteng samoi namar ka kwah ban pynleit jingmut ban pynkhreh ïa ka ilekshon sha ka Meghalaya Legislative Assembly ba ha ki snem ban wan.
