Shillong, Lber 13
Ka All India Football Federation (AIFF) ka pynpaw ka jingsngewlem kaba jur halor ka jingkhlad noh jong u General Secretary barim, u Kushal Das, u ba la shakri ïa ka Federation naduh u snem 2010 haduh 2022. U Das u la khlad noh ha ka sngi Thohdieng, 13 tarik Lber, 2026, ha ka rta kaba 66 snem. U la khlad noh da kaba iehnoh ïa la ka kurim bad ki arngut ki khun shynrang.
U dei uba la pyndep ïa ka jingpule Chartered Accountant, u Kushal Das u la rah ïa ka jingtip kaba khraw ha ka liang ka jingkhmih ïa ki kynhun ïalehkai (sports management) bad ka jingsynshar ha ka liang ka phutbol ha India. Ha ki snem kiba nyngkong jong ka jingtrei kam jong u, u la trei bad ki kynhun bapher-bapher kiba nabar ri, kynthup ïa ka PWC, GSK, bad Shell. Ha u snem 1996, u la rung sha ka IMG kum u Chief Financial Officer (CFO) haba katei ka kynhun kaba dei nabar ri kaba la paw nam ha ka liang ka marketing bad ka pynmih ïa ki prokram televishon ka la sdang ban treikam ha ka ïew ha India. Hadien, u Das u la shakri kum u CFO jong ka International Cricket Council ha Dubai, kaba la pynkhlaiñ shuh-shuh ïa ka nam bad ka jingtip jong u ha ka jingsynshar ïa ki kynhun ïalehkai ha ka pyrthei. Ha u Naiwieng 2010, u la shimti ïa ka kam kum u General Secretary jong ka AIFF, kata ka kam kaba u la bat palat ïa ka shiphew snem tam.
U Das u la khmih ïa ki jingjia kiba la pynkylla ïa ka dur jong ka phutbol bad ki jingpynbeit kiba la ïarap ban kyntiew ïa ka nam ka phutbol ha India. Ha kaba ka ri ka la lah ban pdiang sngewbha ïa ka 2017 FIFA U-17 World Cup.
Ha ka liang ka phutbol ki kynthei ruh, la ïohi ïa ka jingkiew kaba khraw ha kine ki snem kiba la dep, bad ka jingplie ïa ka Indian Women’s League ha u snem 2017. Sha ka kut jong ka por ba u la bat ïa ka kam, ka India ka la pdiang sngewbha ïa ki tournament kiba khraw kynthup ïa ka 2022 AFC Women’s Asian Cup.
U President ka AIFF, u Shri Kalyan Chaubey u la ong, “U Kushal Das u la shim bynta kaba donkam ha ka jingsynshar bad ka jingpynheh-pynsan ïa ka phutbol ha India ha ka por ba u la bat ïa ka kam General Secretary ka AIFF. Ki jingtrei shitom jong u na ka bynta ka phutbol India yn sa kynmaw man ka por. Na ka liang ka kynhun phutbol baroh kawei ka India, nga phah ïa ka jingsngewlem kaba naduh ka dohnud sha ka ïing ka sem jong u ha kane ka por kaba eh.”
U Deputy Secretary General ka AIFF, u Mr. M. Satyanarayan u la ong, “Ka long ka jingsngewsih kaba khraw ban tip halor ka jingkhlad noh jong u Das. U la long uwei na ki General Secretary kiba la shakri slem tam ha ka AIFF, kata kaba palat ïa ka 12 snem. Ha ka por ba u la bat ïa ka kam, ka jingsynshar ha Football House ka la ïohi ïa bun ki jingkylla bad ki tnat thymmai kiba la seng.”
