Shillong, Lber 13
Ka kynhun lehkai phutbol ha India ka don ha ka jingsngewsih hadien ka jingkhlad kyndit jong u nongïalehkai phutbol u ba dei ruh u ‘rang lehkai shadien (defender) ka Namdhari FC, u Ravinder Singh. Une u nongïalehkai uba dang 25 snem ka rta u la kyllon hapoh madan ha ka taïew kaba la leit noh katba u dang ïalehkai ha ka tournament kaba long ha Punjab.
Katba u dang ïalehkai ha kawei ka jingïalehkai ha Ludhiana, u Ravinder u la pang shadem kynsan (cardiac arrest) bad u la kyllon hapoh madan. Watla la pyrshang ban ïarap da ki lad sumar, hynrei la pynbna ba u la khlad noh ha ka sngi Balang.
Ka kynhun ba u don, ka Namdhari FC ka la pynpaw ïa ka jingsngewsih kaba khraw, ka la burom ïa ka jingnoh synñiang jong u sha ka kynhun bad ka la kular ban ïarap ïa ka ïing ka sem jong u ha kine ki por ba shitom.
Na ka liang ka Indian Football League ka la pynmih ka jingpyntip ba ka sngewsih eh bad burom ïa u Ravinder, ka IFL ka la pynbna ba yn don ka jingsngapjar shi minit (minute’s silence) shuwa ban sdang baroh ki jingïalehkai ha ka Matchweek 3.
