Shillong, Lber 13:
U Myntri Rangbah ka Jylla u Conrad Sangma, lyngba ka rynsan social media ‘ Facebook’ u la pynpaw ba ka National People’s Party kan ïai ïeng skhem bad shakri ïa ki paidbah.
U Myntri Rangbah u la ong ba “Ym don kano-kano ka jingeh kaba lah ban pynthut ïa ka jinglong jong ngi, bad ngi dang ïai bteng ban pynbeit ïa ka mat kaba ïadei bad ka syrnod Scheduled Tribe bad ngin ïai trei na ka bynta ka jingbha jingmiat jong ki briew jong ngi. To ngin ïai long kawei bad ngin ïai bteng ban pynkhlaiñ ïa ka NPP.”
Ban pynkhlaiñ ïa ka mynsiem jingïatylli bad jingïalong shipara ha kine ki por, u Conrad u la kyrpad bad kyntu ba kum ki Khristan, dei ban ïa ieit bad ban ïa map.
U la ai khublei ïa ki pulit bad ki heh Sorkar kiba la pynneh ïa ka suk ka saiñ, bad pynpaw ïa ka jingsngewnguh kaba khraw ïa ki paidbah jong ka sor Tura kiba la ïatylli ban pynkhuid ïa ki jaboh jabaiñ bad ban pynphai biang ïa ka jinglong jingman kaba suk ba saiñ.
“Nga sngewnguh ruh ïa ki nongïalam niam jong ngi kiba la kyrpad bad duwai na ka bynta ka jingïa suk,” u la ong.
