Tehran, Lber:
Ki tnat pathai khubor jong ka Iran, ki la pynbna ba ki shipai ka Iran ki la ioh siat pynhap ia kawei ka liengsuiñ shipai jong ka US ha ka thaiñ West jong ka Iraq, da kaba siat da ki ‘namding ba khlaiñ bor jong ka Iran. Hynrei, na ka liang jong ka United States, ka la kyntait ia kane ka khubor bad ong ba katei ka liengsuiñ kam shym la hap na ka jingsiat ki shipai Iran.
Namar la ong ba katei ka liengsuiñ KC-135 ka la leit hap ha ka phang West jong ka Iraq. Katba kawei pat ka liengsuiñ kaba la ngat lang ha katei hi kajuh ka jingjia, ka la lah ban hiar noh sha sla khyndew khlem kano- kano ka jingthud ne jingjulor. Katkum ki lad pathai khubor sorkar jong ka Iran, u nongaiktien jong ka Central Headquarters jong u Nongiathuhlypa Bakhuid (PBUH) jong ka Iran, u la ong ha ka miet jong ka sngi Thohdieng ba ka liengsuin thep umphniang jong ki shipai US ka la shah siat da u namding ba la siat da ki kynhun ialeh pyrshah ha ka thain sepngi jong ka Iraq. Ka khubor ka iathuh ba baroh 6 ngut ki nongtrei kiba don ha ka liengsuin ki la iap.
Ka tnad pynïadei bad ki paidbah jong ka kynhun shipai Islamic Revolution Guard Corps (IRGC) ka la pynmih ruh ïa ka jingpynbna kaba ong ba ki kor ïada suiñ jong ka kynhun ïaleh pyrshah ki la jop ban siat ïa ka liengsuiñ Boeing KC-135 Stratotanker katba ka dang pyndap umphniang ïa ka “liengsuiñ ïaleh pyrshah ba leh donbor.” Ka kyrwoh ka iathuh ba 6 ngut ki nongtrei jong ka liengsuin ki la iap ha katei ka jingshah thombor.
Ka Islamic Resistance ha Iraq, ka kynhun ba la pyniasoh lang da ki kynhun kieng atiar ba la kyrshan da ka Iran, ka la shim ia ka jingkitkhlieh halor katei ka jingthombor. Ha ka jingpynbna jong ka, ka kynhun ka la ong ba ka la siat ïa ka liengsuiñ KC-135 “ban ïada ïa ka jinglong trai ri bad ka suiñbneng jong ka ri jong ngi,” ong ka Reuters.
