Bengaluru, Lber:
U Symbud Myntri Rangbah jong ka Karnataka, u D K Shivakumar, ha ka sngi Ba-ar, u la ong ba ka jingduna jong ka jingpyndap ïa ki LPG, ka la kylla long ka jingeh kaba khraw ha katei ka jylla, hapdeng ka jingmaham jong ki trai hotel, ba ki lah ban shah pynbor ban khang noh ïa ka jingtreikam, lada ka jingpynbiang, kam kiew kloi.
Haba kren sha ki nongthoh khubor ha Bengaluru, u Shivakumar u la ong ba ïa katei ka kam dei ban ïakren ha Parliament bad u la kyntu ïa ki dkhot ka Parliament ba kin rah ïa katei ka mat, namar ba ka jingduna ka ktah ïa ki kam khaïi bad ïa ki paidbah.
“Ka sorkar ka dei ban ïakren ïa kane ha Parliament. Ki dei ban ailad ïa ka jingïakren mynta ka sngi. Naduh mynta ka sngi hi, ngi ïakynduh jingeh. Ym don stok shuh,” u la ong.
U Myntri Rangbah ka Jylla u la kynthoh ïa ki MP jong ka BJP ba kim shym la kren eiei shaphang ka jingduna LPG watla ka ktah ïa ki kam khaïi kum ki hotel bad ki jaka ai jingbam.
U la kdew ba ki nongpynïaid hotel ki la sdang ban pynduna ïa ka jingtreikam jong ki namar ka jingduna ka jingpynbiang ha ka rukom pynpoi bad pyndap ïa ki LPG.
“Mynta, namar ka jingkiew dor jong ka Gas bad ka jingduna Gas, ki briew ki ïakhih, hynrei ki MP jong ka BJP kim kren eiei ïa kane. Ki pynmih ïa ka sur jong ki ha kiba bun kiwei pat ki mat – kaba phylla – hynrei ki sngap jar halor kane,” u la ong.
U Shivakumar u la kdew ruh ïa ka jingkiew dor jong ka umphniang, da kaba ong ba dang shen ka dor jong ka Diesel ka la kiew bha, kaba la pynjynjar shuh shuh ïa ki kam khaïi.Katkum ka jingong jong u, ka jingktah lang jong ka jingkiew dor jong ka umphniang bad ka jingpynthut ïa ka jingpynbiang ïa ka LPG ka ktah ïa ka kam ba ïadei bad ka jinglah ban pynïadei kam.
U la ong ba wat u Myntri Rangbah barim u H D Deve Gowda u la kren ïa ki katto katne ki mat kiba ïadei bad ka Karnataka bad u la kwah na ka bynta ka jingïamir jingmut.
“U Deve Gowda u kren shaphang ki projek Mekedatu bad Yettinahole. Ai ba un bthah ïa ki MP jong ka seng jong u ban ïakren ïa kane (ka jingduna umphniang) ha Parliament. Kam long kaba dei ïa nga ban thombor ïa u da ka ktien, haba pyrkhat ïa ka rta jong u. Ailad ïa u ba un ai jingmut na ka bynta ka Mekedatu bad Yettinahole. Ai ba ka seng jong u kan ïakren bad ki MLA shaphang kaei ba ka seng ka leh, bad ngan ïakhun ïa ka bad kaei ba ngi la leh,” la ong u Shivakumar.
Ki seng jong ki hotel ha ka jylla ki la maham ba ka jingduna ki jingshalan kaba dang bteng ka lah ban pynbor ïa ki jaka treikam ban khang shipor, khamtam kito kiba shaniah ha ki tyndong LPG ba die marbam na ka bynta ban shet jingshet man ka sngi.
U Myntri Rangbah ka Jylla u la pyni ba kane ka mat ka donkam ban shimkhia kyrkieh ha ka kyrdan jong ka ri, namar ka jingpynbiang LPG bad ka jingbuh dor ka hap hapoh ka jingpeit jong ka sorkar pdeng.
