Shillong, Lber 13
Ka jingjia ha Rilum Garo ha kine ki sngi bad kaba dang bteng haduh mynta ka pynkynmaw ïa kito ki sngi kiba uwei na ki nongïalam jong ka Khun Hynñiewtrep National Awakening Movement (KHNAM) ha kito ki por, u Bah Adelbert Nongrum ula mih ban ïakhun bad dawa ban pynbeit ïa ka AD rules 128.
U Bah Adelbert Nongrum ha kito ki por haba u kren hapoh ka ïingdorbar ka KHADC bad ïam jaw ummat, kiba bun ki beiñ bad ong ba u ïam kum u khyllung, hynrei lada phai dien biang mynta hadien ka jingjia ha Rilum Garo la sngewthuh mynta ba ka long kaba donkam ban pynkylla.
Kum u Nongïalam u Bah Adelbert ha u snem 2017 u la kren la bun bunsien ha District Council bad ka ba la pynlong ïa u haduh ba un hap ban ïam Rangbah ha District Council ha u snem 2017 namar kum ki MDC na kawei ka samoi sha kawei ka samoi (term) ki la shu leh klet ban pynbeit ïa ka AD rules 128, ki la shu sngap halor ka jingailad jong kane ka aiñ ïa kiwei ki jaitbynriew wat ki bym dei riewlum ki lah ban ïashimbynta ban long ki nongthep vote bad ban ïakhun ïa ka ilekshon ha District Council.
Haba kynmaw ba ha kito ki por kum u nongmihkhmat u ju buh jingkylli lada kiwei ki jaitbynriew kin ïoh rung hapoh ka Autonomous District Council kane ka Council kan dei noh ka jongno ha kata ka por?. Ka Council kan ym ai shuh ïa ka jingïada ïa ki riewlum lada kiwei ki bym dei riewlum kin ïoh ïashim bynta. Kan ym ai jingïada shuh ïa ki trai ri trai muluk.
Mynshuwa ïa u Bah Adelbert ki ong ba u ïam baid, hynrei u Blei u ai ka sap ba un don ka jingpyrkhat jngai. Ngi don ka jingkyrmen ba ki Nongïalam jong ka Jaitbynriew jong ngi khamtam ki MDC kiba don hapoh ka KHADC bad JHADC kin ïohi ïa kaei kaba la jia mynta bad shim ïa ki sienjam ban thaw ïa ki aiñ kiba khlaiñ ba kiwei ki bym dei riewlum kin ym ïoh ban ïashim bynta ban thep vote ne ïeng ilekshon ha ki District Council.
