Shillong, Lber 13
Halor ka jingujor kawei ka longïing ha Dymmiew Shillong kaba hap hapoh ka Shillong Municipal Board ba ki ïoh ïa ka umbam umdih kaba sma nala bad kaba jngut, na ka liang ka State Food Testing Laboratory ka la rah ban peitbniah ïa kane ka um.
Ha ka jingpeit bniah ka SFTL ka la lap na ka kaiphod ba kane ka um sorkari ba la sam sha ki longïing ka long kaba don jingma ha ka koit ka khiah jong ki briew bad kam dei ka jinglait ne pei thliew na ki pipe um.
Ha ba la peitbniah ïa kane ka um la lap ba ka don ïa ki khñiang jingpang, kum ki total Coliform, e-coli, mould, ka jingsma, ka jingjngut, bad ka don ïa ki magnesium, bad iron ruh kumjuh.
Kumta ka jingdon ïa kine ka buh jingma ïa kiba pyndonkam bad kam long shngaiñ ïa ka koit ka khiah ki briew, katkum ka section 3.1 (ZZ) jong ka Food Safety and Standard Act 2006.
Katkum ka durkhih ba la ïoh lum la sakhi ïa ka jingjngut ka umbam umdih bad kaba don ruh ïa ka jingsma iwtung.
Kumta na ka liang ki longïing ha Dymmiew kiba la ïoh pdiang ïa kane ka umbam umdih kaba jngut ki la kyrpad ïa ka tnad ba dei peit ban pynkloi mardor ban wanrah ïa ka um kaba khuid bad kaba don ka jingshngaiñ.
