Guwahati, Lber:
Ki pulit ka Assam ha ka 12 tarik u Lber ki la maham ba yn shim da ki kyndon aiñ kiba tyngeh pyrshah ïa ki riew shimet kiba pynsaphriang ïa ki khubor hamsaïa halor ka jingduna ka LPG bad kiwei kiwei ki mar umphniang ha ka jylla.
Ha ka jingthoh halor ka rynsan X, ki pulit ka Assam ki la ong ba kino kino kiba pyrshang ban pynsaphriang ïa ki jingtip kiba ïalam bakla ha kaba ïadei bad ka jingduna ka Liquefied Petroleum Gas (LPG), petrol, diesel bad kiwei kiwei ki mar umphniang kin ngat ha ki jingpynshitom kiba tyngeh katkum ka aiñ. Ki pulit ki la kyntu ruh ïa ki nongshong shnong ba kim dei ban ngeit ne pynpoi ïa kum kine ki jingkynnoh, da kaba pynpaw ba ki “riew pyrshah” ki lah ban pyrshang ban pynphriang ïa ki jingtip kiba bakla ban pynmih ïa ka jingtieng ha ki paidbah.
Kane ka jingmaham ka wan shisngi hadien ba u Chief Secretary ka Assam u Ravi Kota u la ong ba ki karkhana pynkhuid umphniang ha ka jylla mynta ki don ka jinglah ban pyndap tang kumba 30 percent na ka jingdawa LPG jong ka Assam, kaba la pynmih ïa ka jingsngewkhia halor ka jingduna kaba lah ban jia ha ki sngi ban wan.
Ban ïada na ka jingtieng bad jingpyntip bakla, ka sorkar jylla ka la thaw ïa ka komiti ba kyrpang ban buddien ïa ki khubor lamler, ki khubor kiba ïalam bakla bad ki jingkynnoh lamler kiba lah ban wanrah ïa ka jingkulmar hapdeng ki nongthied nongpet.
U Kota u la ong ba ka sorkar jylla ka la dep ban kyrpad ïa baroh saw tylli ki Refinery kiba treikam ha Assam ban pynbun ïa ka jingpynmih khnang ban pynthikna ïa ka jingpynpoi LPG khlem jingthut sha ki nongpyndonkam.
U Chief Secretary, ha ryngkat u Director General of Police ka Assam u Harmeet Singh, ki ophisar na ka tnad sam marbam bad ki nongmihkhmat jong ki kompeni die umphniang, ki la ïashim bynta ruh ha ka jingïakren lyngba ka durkhih bad u Union Home Secretary u Govind Mohan.
Ha kane ka jingïalang la kynthup lang ïa ki Chief Secretary bad ki DGP na ki jylla bad ki Union territories bapher bapher ban bishar bniah ïa ka jingdon bad ka jingpynbiang ïa ka LPG bad Diesel ha kylleng ka ri.
