Shillong, Lber 13:
U Bah H.Khriem u ba dei u Rangbah Shnong ka Mylliem u la ong ba u dang pyrkhat ba ki nongtuh pisa na ATM ha Mylliem ki dei kiba najan hynrei u kyndit ban ïohi ha ki khubor ba ki nongtuh ki dei naduh Haryana.
Haba ïakren bad u nonglum khubor u la pynpaw ka jingai khublei ïa ki pulit ka Meghalaya kiba la trei shitom ban ïoh kem ïa u runar u ba donkti ban tuh pisa na ka ATM kaba don ha Mylliem.
U la ïathuh ruh ba ïa uto u ba shah kem na Haryana um ithuh watla u la ïohi ïa ka dur khmat malu mala hynrei lehse u shu wan ban tuh na ka tei ka ATM na Mylliem.
U la ïathuh ba kum kane ka jingshah tuh pisa na ATM ka la jia arsien ha Mylliem hynrei u ong ba kine ki nongtuh ki dei kiba shyrkhei namar ki tip ïa ka jingdon pisa hapoh ATM .
U la ong ruh ba la ki khasi ki don bynta ne em ha kane ka kam tuh ym don jingtip eiei hynrei ka shong ha ka bor jingstad ki pulit ban wad bniah halor kane.
Shuh shuh u la ong ruh ba kane ka jingshah lute kane ka ATM ha Mylliem ka long kaei kaei kaba sngewsih bad ka long ka jingduhnong ïa ki nongshong shnong bad ïa ki nongleit nongwan namar kane ka ATM ka la ai shibun ka jingshakri bad lada jia kum kine ka pynduh nong namar ha ka jaka ban sei pisa kiba bun ki la duh.
Lah ban kdew ki pulit ka Meghalaya dang ha kine ki khyndiat sngi ki la leit ban shimti ïa u runar uba donkti ban tuh ha katei ka ATM na Haryana u ba la tip kum u Rahul Khan ha kaba ki nongshnong shnong jong kawei ka shnong ha Haryana ki la mih paidbah ban khanglad ïa ki ban rah ïa une u runar ha kaba ki pulit kim banse ban siat pyntieng ïa ki ha kaba uwei na ki paidbah u la mynsaw na ka kjat.
