Jerusalem, Lber:
Katkum ki khubor, la ong ba ka Israel, ka la pynbna ia ka jingleit hiar thma jongka sha Beirut, ha kaba u Myntri Rangbahduh katei ka ri, u Benjamin Netanyahu, u la maham ba lada ka sorkar Lebanon, kam pynduh noh ia ki tiar thma jong ka Hezbollah, ka Israel, kan leh ïa ka kam “ha madan”.
“Phi ïalehkai bad ka ding,” ong u Benjamin Netanyahu ha ki bor synshar jong ka Lebanon, ha ka jingïalang bad ki nongthoh khubor, ha ka por ba ki liengsuiñ jong ka Israel, ki la pynlong lai tylli ki jinghiar thma ïa ki jaka ba shathie jong ka Beirut — arsien, khlem da ai jingmaham lypa, ong ka National News Agency (NNA).
Haba ïadei bad ka jingkular ba la pynpaw da ka sorkar Lebanon ban pynduh tiar ïa ka kynhun ba la kyrshan da ka Iran, u myntri rangbah u la bynrap “lada phim leh kumta, ka paw shai ba ngin leh kumta”. “Kumno ngin leh? Ha madan. Da ki shipai madan bad kiwei kiwei,” u la ong. Ha ka Sngi Palei, ki shipai Israel ki la pynbna “ka jingkhyllem jong ki jinghiar thma kiba thmu ïa ki jingtei jong ki lehnoh Hezbollah ha kylleng ka Beirut”, ha kaba ki dur jong ka AFPTV ki pyni ïa ka tdem kaba dum kaba kiew sha bneng halor ar tylli ki distrik ha pdeng jong ka nongbah. Kawei na kitei ki jingiakhih, ka la ther ia kawei ka iing ha Bashoura, kaba don marjan bad ka jaka khaii jong ka Beirut, ha kaba bun ki kompeni heh bad ki jaka treikam sorkar, ki don.
U nongaiktien jong ki shipai Israel, ula kynnoh ïa ka Hezbollah, ba ka la “buhrieh… da ki million tyngka” hapoh katei ka jingtei.
Hadien kata la bud sa kawei pat ka jinghiar thma ïa kawei ka tnat Beirut jong ka Al Qard Al Hassan kaba don ka jingïadei bad ka Hezbollah, ha ka jaka ba don ha pdeng sor jong ka Zoukak El-Blat.
