Shillong, Lber 13
Ka Hynñiewtrep Youth Council (HYC) Mawlai Circle hapoh ka jingïalam u Organising Secretary ha ka 13 tarik u Lber 2026, lyngba ka SIER LAPALANG OPERATION (SLO) ka la ïoh ban pynher krad ïa kumba 17 ngut ki bar jylla kiba wan trei beaiñ hapoh u pud u sam jong ka Mawlai ha NEHU campus.
Ka seng lyngba ka kyrwoh na u Bah S.Marwein Organising Secretary ka ong ba kine ki dei ki jingsdang jong ka SLO mynta u snem, bad kin nang pynjur shuh shuh ban khynra ïa ki bar jylla kiba wan bylla khlem kot khlem sla (labour card) hapoh ka shnong Mawlai.
U la bthah ruh ïa ki kontraktor ba lada ki buh nong bylla dei ban shim shuwa da ki Khasi, namar bun ki Khasi kim ïoh bylla shuh mynta ki por, namar ki kontraktor ki la wanrah nongtrei da u bar jylla, uba ki ong u kham tad dor.
“Lada phi kwah ka kam jong phi kan ïaid beit sngewbha burom ïa ka jingkyrpad jong ka seng ban buh nong bylla da ki khasi, sha baroh ki ‘construction site’ hapoh ka shnong Mawlai” u la ong.
Ha kajuh hi ka sngi la sakhi ba ka Hynñiewtrep Integrated Territorial Organisation (HITO) Mawlai Circle bad Nongkwar unit, ki la leit ban peit ïa ki kot ki sla jong ki nongtrei bar jylla ha Mawlai Lummawnei ha ka jingïalam jong u Vice President ka Mawlai circle bad u President ka Nongkwar unit, u Samla Joshua Nesly Kharsyntiew.
Ha kane ka sngi la synran lang ruh da ki dkhot jong ka Nongkwar unit bad kiwei-kiwei de.
Ha kane ka sngi ka HITO ruh ka la lap ba ki bar jylla kiba trei ha katei ka jaka kim shym don ïa ki kot ki sla kiba biang.
Kumta mar-mar ka seng ka la phah song jaiñ bad beh krad noh ïa kine ki bar jylla ki bym shym la don ïa ki kot ki sla kiba biang ban wan trei ha ka Jylla.
