Shillong, Lber 13
U Bah Prestone Tynsong Symbud Myntri Rangbah ka Sorkar Jylla Meghalaya u la pynbna ba ka Sorkar kan noh synñiang T.30 lak sha ka St. Joseph’s Secondary School Laitkor na ka bynta ba kan ïoh ban pyndonkam ha ki jingdonkam hapoh jong ka Skul.
Ïa kane u Bah Prestone u la pynpaw ha ka por ba ai jingkren ha ka jingïa shimbynta ha ka jingrakhe jubilee dap 100 snem ka St. Joseph’s Secondary School Laitkor kaba la long ha ka sngi Thohdieng.
Kum ka dak jong ka jingplie ïa kane ka jingrakhe ka jingdap ba 100 snem katei ka skul, u Bah Prestone u la pynher ïa ka lama jong ka skul bad ai jingpynbna ba la plie ïa ka jingrakhe jubilee ka skul.
Ha kane ka jingïalang la donlang u Bah Johny Mawrie, ki Father, ki Sister, ki riew rangbah, ki nongpynïaid, ki nonghikai jong ka skul, ki khynnah skul bad ki kmie ki kpa jong ki khynnah Skul.
Ïa ka St. Joseph’s Secondary School la seng ha u snem 1926 bad mynta u snem ka la kynjoh 100 snem ka jingai jingshakri jong ka ha ka ban ai jingnang jingstad bad jingtip ïa kiba bun ki nongshong shnong jong ka thaiñ bad ka skul ha une u snem kan pynlong ïa ka jingrakhe jubilee ba shisnem lynter da kaba yn pynlong ki prokram lehkmen bapher-bapher.
Haba kren ha kane ka sngi kum u Kongsan u Bah Prestone Tynsong u la ong, kane ka dei ka sngi ba kyrpang na ka bynta ka skul namar ka dei ka sngi ba la plie ïa ka jubilee jong ka bad u la ai jingïaroh ïa ki khynnah skul kiba la ïashim bynta lyngba ki jingshad ki jingrwai bad kiwei-kiwei.
