Shillong, Lber 13:
Ka Shillong Muslim Forum (SMF) mynta ka sngi ka 13 tarik u lber 2026 ka la phah da ka shithi sha u Myntri Rangbah ka Jylla u Conrad Sangma ha kaba ka la pynpaw ïa ka jingsngewkhia kaba khraw halor ka jingkulmar kaba dang shen ha West Garo Hills bad kyrpad ruh ban ïada ïa ki jaka mane blei bad ban wanrah biang ïa ka shongsuk shongsaiñ bad ka jingïatylli lang ha ka Jylla.
Ha ka shithi, ka Forum ka la pynpaw ïa ka jingsngewkhia halor ki khubor ba la pynjulor ïa ki jaka mane blei bad kiwei-kiwei ki jingjia jong ka jingïakynad bad jingpynjot ïa ki mar ki mata ha ka por ba don ka jingïakynad, kynthup ïa ka jingpynjulor ïa ka Tura Jama Masjid bad kumjuh ruh ka jingthang ïa ki ophis bad ki jaka treikam ha ki jaka ba shah ktah. Ka Forum ka la pynpaw ba kum kine ki jingjia ki long kiba sngewsih haduh katta-katta bad ki pynthut ïa ka jingsuk bad jingïatylli kaba la slem bha kaba ki jaidbynriew ha Meghalaya ki la ïasam naduh ki pateng bynriew.
Ka Shillong Muslim Forum ka la pynrem jur ïa baroh ki rukom thombor bad pynjulor ïa ki jaka mane blei, ki jaka treikam jong ka imlang sahlang, bad ki mar ki mata jong ki paidbah, khlem da kheiñ ïa ka jaitbynriew ne ka seng kaba donkti.
Ka Forum ka la pynpaw biang ruh ba ka jingkyrpad jong ka na ka bynta ka jingïada ïa ki jaka mane niam bad ka jingshngaiñ bad jingïatylli jong baroh ki jaitbynriew kiba sah ha ka Jylla. Kum ki dkhot jong ka jaitbynriew rit paid kiba la shong la sah ha Meghalaya da ki pateng bynriew, ka Forum ka la pynpaw ba ki Muslim ha Shillong ki kheiñkor bha ïa ka jingïa shongsuk shongsaiñ bad ka jingburom markylliang bad ki jaidbynriew riewlum.
Ka Forum ka la pynpaw shuh shuh ïa ki jingsngewkhia jong ki trai ri trai muluk ha kaba ïadei bad ka jingwan buhai shnong be-aiñ bad ka la ong ba ki Muslim ba shisha ki bym dei ki riewlum kiba la long slem bha kum shi bynta jong ka imlang sahlang jong ka Meghalaya ki kyrshan ïa ki jingpyrshang katkum ka aiñ ban ïada ïa ka hok, ka jinglong kyrpang, bad ki jingmyntoi jong ki trai ri trai muluk jong ka Jylla.
Ka Forum ka la pynpaw ruh ïa ka jingsngewkhia haba ïadei bad ka jingïalang paidbah dangshen, kaba don kiba ong “Ym don Allahu Akbar ha Meghalaya,” da kaba kdew ba ka kyntien “Allahu Akbar,” kaba mut “U Blei Uba Khraw Tam,” ka dei ka jingpynpaw ba kyntang jong ka jingngeit ba ki Muslim ki pyndonkam ha ka por ba ki duwai man ka sngi bad ki leh niam. Ka Forum ka la pynshai ba, kum man la ka niam kaba don la ki jong ki jingpynpaw kyntang ha ki ktien bad ki riti dustur bapher-bapher, kane ka kyntien ka bat ïa ka jingmut kaba jylliew ha ka jinglong mynsiem na ka bynta ki Muslim. Ha kajuh ka por ka Forum ka la pynrem jur ïa ka jingpyndonkam bakla ïa kano kano ka jingpynpaw niam ha ki kam thombor ne ki kam bymman.
Ka Shillong Muslim Forum ka la kyrpad ïa ka Sorkar ba kan pynthikna ïa ka jingïada ïa baroh ki jaka mane blei bad ki jaka treikam jong ki paidbah bad ban shim ïa ki sienjam kiba biang ban khanglad ïa kum kine ki jingjia ba kin nym jia biang katba dang ïai bteng ïa ki jingpyrshang ban wanrah biang ïa ka shongsuk shongsaiñ ha kane ka thaiñ.
