Nongpoh, Lber 13:
Ha kawei ka jingjia hynnin ka miet shiteng synñia, kawei ka trok kaba kit ïa ki tyndong Gas ka la kem ding kynsan ha ki bynta jong ka surokbah National Highway 6 kaba dang hap ha ka shnong Pahammawlein 20 Mer katba ka dang thmu ban kiew sha nongbah Shillong na Guwahati.
Katkum ka khubor ba la ïoh lum, la ïathuh ba katei ka jingjia kadei ha ka por kumba 12:55 baje shiteng synñia haba katei ka trok kaba don ïa u registration number AS01SC1518 tang mar ïa poi marjan bad ka khyrdop khrong khajna jong ka National Highway Authority of India (NHAI), kala kem ding kynsan bad ïoh ban bam duh ïa ki bynta ba shakhmat jong ka kali.
La antad ruh ba ka daw jong katei ka jingkem ding kynsan katei ka kali, kadei namar ka jingthut jong ka bording (short circuit) hapoh ka kali.
Tang mar ïa ïoh jingtip halor kane ka jingjia, ki pulit ka thanad Byrnihat ryngkat bad ki pulit pynlip ding ki la hiar mar mar sha katei ka jaka ban tem ïa ka jingklang jong ka ding kaba la lah ban pynlip noh tang kumba katto katne por hashwa ba kan pur sha ki tyngdong Gas.
Ka tyllong khubor ka ïathuh ruh ha kane ka jingjia, kam shym la don satia kano-kano ka jingmynsaw ne ka jingjia ba sngewsih ïa u nongñiah katei ka trok bad ki paidbah nongleit nongwan.
