Nongstoiñ, Lber 13
Ka Synjuk ki Nongsynshar Shnong Nongmynsaw Syiemship da ka wei ka sur kala shim ïa ka rai ban leit ïashim bynta ha ka Rally bad ka jingïalang kaba la khot da ka Federation of Khasi Jaiñtia & Garo People West Khasi Hills ha ka 16 tarik mynta u bnai ha sor Nongstoiñ halor ka jingdawa ïa ka Sorkar ban pynbeit noh kloi ïa u pud u sam ka Meghalaya bad Assam.
U Bah Sandiwel Sunchiang nongaiktien ka Synjuk ki Nongsynshar Shnong Nongmynsaw Syiemship u la ong ba ïa kane ka rai na ka liang ka Synjuk ka la shim ha ka sngi Thohdieng jong ka taïew ha ka jingïalang kaba la long ha Langpih.
Shuh shuh u la ong ruh ba ka jingleit ïashim bynta jong ka Synjuk ha kane ka rally ka long halor ka nongrim jong ka jingangnud jong ki paidbah ka dong ka thaiñ Langpih hi baroh kawei ba ïa ka wat ba ar (Phase-II ) jong ka jingïa pynbeit pud khamtam ka Langpih Sector dei ban pyndep noh.
“Da ki phew tylli ki snem ki paidbah ka thaiñ ki la iai dawa ba ka thaiñ Langpih kaba hap hapoh ka Hima Nongmynsaw Syiemship ka dei ban pynhap beit hapoh u pud u sam sha Meghalaya” u la ong.
U Bah Sandiwel u la ong ruh ba “Ngi la ïohi na ka wei ka Sorkar sha kawei pat ka Sorkar ba ki la shu iai pynthame ïa ki paidbah tang da ka ktien halor kane ka mat (issue) hynrei kam poi shuh kata ka jingïa pynbeit”. U la ong ruh ba ka jingïaid shakhmat jong ka Sorkar MDA ban pynbeit ïaka phase-I kala pyn sngew kyrmen ïa ka thaiñ Langpih ba yn sa lah ban pyndep noh ïa kane, hynrei haduh mynta “Ngi sngewthuh ba kam shym poi sha kata ka thong jong ka jingpynbeit noh ïa u pud, namar kata sa shisien ngi dawa jur ïa ka Sorkar Jylla ba ka dei ban pynurlong noh kloi lan ïa kane ka mat.”
