Tura, Lber 15
Watla ka jinglong-jingman ha ka distrik jong ka West Garo Hills (WGH) ka ïai long kaba suk ba saiñ, hynrei na ka liang u Deputy Commissioner, u Vibhor Agarwal u la bteng ban pynjlan ïa ka korphiw sa da shisngi kum ka lad jingïada.
Ka jinglong-jingman ha West Garo Hills ka ïai long kaba suk ba saiñ haduh mynta ka sngi, ha kaba ym shym la don kino-kino ka jingjia ha kino-kino ki bynta jong ka distrik.
“Kum ka lad jingïada bad kum shi bynra ban wanrah biang ïa ka suk ka saiñ kaba pura, la pynjlan shuh-shuh ïa ka korphiw naduh ka por 6:00 baje mynstep jong ka 16 tarik u Lber haduh ka por 6:00 baje mynstep jong ka 17 tarik u Risaw, lait noh lada weng noh hashuwa. Ïa ka korphiw yn pynjynsur na ka bynta 12 kynta ba pynsuk ïa ki kam ki jam kumba ju long,” ong ka hukum na u DC.
Ha kane ka por jong ka jingpynjynsur, baroh ki shlem pule, ki ophis, ki ‘bank’, bad kiwei-kiwei kin treikam kumba ju long.
Katba ka jinglong-jingman ha ka distrik ka nang wanphai biang suki-suki sha ka jingmanbha, ka ‘Peace Crusade’ kaba la ïalam da ki nongïalam Balang ka la bteng biang ha ka sngi kaba saw, ha kaba la pynlong ïa ka jingïaseng duwai ha Madan Chandmari, Tura.
Ki bor distrik ki la pynpaw biang ïa ka jingsngewnguh sha ki nongshong shnong kiba la ïai bteng ban khang lad ïa ki jingkulmar bad ban pynneh-pynsah ïa ka suk ka saiñ.
Ha kawei ka liang, ki bor pahara ki dang don ha baroh ki jaka ba kongsan katba ki bor distrik bad ki pulit ki ïai bteng ban peitngor ïa ka jinglong-jingman ha kylleng ka distrik.
