Shillong, Lber 15
U Myntri Rangbah ka Jylla Conrad K Sangma ha ka sngi U Blei u la bthah ban ai ïa ki jingïarap kiba mardor sha ki longïing kiba la shah ktah na ka jinghap phria dang shen.
Kane ka jingbthah ka la mih hadien ba la pynïaid ïa ka jingïalang bishar bniah bad u Chief Secretary, u Commissioner & Secretary ka tnad Revenue and Disaster Management bad ki Deputy Commissioner jong ki District kiba shah ktah na ka bynta ban bishar bniah ïa ka jingjulor na ki jinghap slap ba dang shen.
U phria uba jur u la lynshop ha kylleng ki jaka kynthup ha ki bynta ka ri-lum Khasi Jaiñtia bad ka ri-lum Garo ruh khamtam ha Tura, kala sakhi ïa ka jinglynshop u phria ba heh kat ki bol golf hynne ka step por 3 baje, kaba la pynjulor ïa bun tylli ki ïing, ki kali bad ki jingthung jingtep.
Une u phria u la neh kumba 20 minit bad pynpei thliew lut ïa ki tnum ïing tin bad ki ïit kali kiba pynïeng harud ki surok bad ki jaka madan ki bym don jingker.
Ha ka jingïalang, u Myntri Rangbah u la bthah ïa ki heh ophisar ba kin peit thuh bha ïa ka jinglong jingman bad ban pynthikna ba kin ai ïa ki jingïarap ba mardor sha ki longïing kiba shah ktah khlem ka jingpynslem.
U la bthah ruh ïa ki bor district ba kin shim kyrkieh ïa ki sienjam ban pynbha bad maramot biang ïa ki jingtei kiba donkam u paidbah ba man ka sngi kynthup ka jingpynpoi umbam umdih, ka bor ding ilektrik bad kiwei kiwei.
La bthah ïa ki ophisar ba kin peitngor bad ïatreilang bad ki bor shnong ha ka ban lum jingkheiñ ïa ki jingjulor bad ban leit ai jingïarap kham kloi ïa ki briew kiba shah ktah ha une u phria.
Ha kajuh ka por, u Commissioner & Secretary ka tnad Revenue and Disaster Management u la ong ba ka lyer kaba jur bad u slap ki la ktah ïa ki bynta jong ka nongbah Shillong, Nongstoiñ, Tura bad Baghmara, ha kaba ki dieng ki la khyllem bad hap ha ki dieng ilektrik.
