Jowai, Lber 15
Ka Khliehtyrchi SC ka la pynliem noh ïa ka Moodymmai SU da 119 run ha ka lympung ïalehkai District Cricket League 2026 ba la pynïaid da ka West Jaiñtia Hills District Cricket Association, Jowai ha ka sngi Saitjaiñ.
Ha kane ka jingïalehkai kaba la long ha Khliehtyrchi Mini Stadium, ka Khliehtyrshi SC ka la jop ïa ka kynting pisa, ka la shimti ban tied nyngkong ha kaba ka la kamai 250 run ha ki 35 over bad shah pynhap 7 wiket. U H Timi Ryngkhlem u la long u nongtied uba kynsai ha kaba u la ïoh ban khyrwit 88 run na ki 85 bol kynthup ïa 5 tylli ki ‘six’ bad 4 tylli ki ‘four’. Kumjuh u Yoomi Patwet u la tied ïa ka shiteng spah kaab 61 run na 52 bol kynthup ïa 10 tylli ki ‘four’. Katba ki nongkawang bol ka Moodymmai, u Kyntumiki Slong, Nehlang Pariat, bad Rijest Lytan ki la khur mar 2 wiket.
Haba wan beh ïa ka thong, ka Moodymmai SU ka la kamai tang 131 run hadien ba ka la shah pynkhyllem baroh ki nongtied ha ki 22.1 over. U Kyntumiki Slong u la tied 27 run na 14 bol, kumjuh u Bishar Lamare u la ïoh 25 run na 18 bol bad u Rijest Lytan u la ïoh 24 run na ki 15 bol. Na ka liang ki nongkawang bol ka Khliehtyrshi SC, u Peter Nongtdu u la khur 4 wiket na 7 over, katba u H Timi Ryngkhlem bad u Khimti Dkhar ki la khur mar 2 wiket. Ïa ka nam Man of the Match la ïoh da H Timi Ryngkhlem.
Haba phai sha kawei pat ka jingïalehka kaba ar ha Wahïajer Mini Stadium, ka Goodwill Mupliang SC ka la jop da 8 wiket ïa ka Riwar Titan CC. Ka Riwar Titan kaba la shimti ban tied nyngkong ka la kamai 210 run ha ki 35 over bad shah pynhap 6 wiket. U Mickey Marngar u la khyrwit ïa ka shiteng spah kaba 84 run na 81 bol kynthup ïa ka 4 tylli ki ‘six’ lem bad 9 tylli ki ‘four’, katba u Pusonbha Rymbui u la tied 72 run na 82 bol kynthup ïa 2 tylli ki ‘six’ lem bad 7 tylli ki ‘four’. Na ka liang ki nongkawang bol ka Goodwill Mupliang SC, u Greatestful Lyngkhoi bad Echwa Phawa ki la khur mar 2 wiket.
Haba wan beh ïa ka thong, ka Goodwill Mupliang SC ka la lah da kaba suk ban jop ïa ka liang pyrshah da kaba kamai 214 run ha 26.1 over bad shah pynhap 2 wiket. Kane ka la wan lyngba ka jingïalehkai bha u Byforcestar Dhar uba la ïoh ban khyrwit 110 run na 81 bol kynthup ïa 8 tylli ki ‘six’ bad 10 tylli ki ‘four’, lem bad u Oniwanker Sna uba la tied ïa ka shiteng spah kaba 65 run na 62 bol kynthup ïa 3 tylli ki ‘six’ lem bad 8 tylli ki ‘four’. Katba ki nongkawang bol ka Riwar Titan CC, u Pynkhraw Khonglah bad Habanjop Khonglah ki la khur mar 1 wiket. Ïa ka nam Man of the Match la khur da u Byforcestar Dhar.
