Shillong, Lber 15
Ka jingïakynduh lang ki nongrep, ki nongri dohkha bad ki nongri jingri ka la shongshit puk ha kaba da ki hajar ngut ki paidbah ka thaiñ ki la tuid sha ka madan Mawsadang ban wan ïashimbynta ha ka ïew ïadie ïathid kaba la long ha ka sngi Saitjaiñ.
Ïa kane ka “Farmers Meet Cum Fish Fair” la pynlong da ka Ïatreilang Farmers Producers Organization ha ka jingïatrei ryngkat ka tnad Fisheries jong ka Sorkar Meghalaya bad ka National Fisheries Development Boards Hyderabad.
Ha kane ka sngi la wan ban plie ïa ka jingïakynduh lang ki nongrep da u MLA ka Mawphlang Constituency u Bah Matthew Beyondstar Kurbah, u rangbah shnong ka shnong Mawsadang u Bah Bimar Sing Nongbet lem kiwei de ki riew paw khmat jong ka thaiñ.
Kane ka jingpynlong ïa kane ka tamasa ka long shi bynta ban lum ban lang ïa ki nongrep jong ka thaiñ kumjuh ban kyntiew ïa ka kam rep bad ban pynïasoh ïa ka kam jngohkai pyrthei ha ka thaiñ.
Ha ka ïew ki nongrep la sakhi ba don kumba 40 tylli ki dukan ïadie ïathied kynthup naduh kiba die ïa ki jingbamtynrai, ki soh ki jhur bad ki syntiew kiba rep hi ki nongrep, khlem da pyndonkam dawai.
Haba ïoh ïakren ïa ki nongrep ki la pynpaw ka jingsngewkmen kaba khraw ïa ka jinglah ban pynlong ïa kane ka tamasa ha kaba ki lah ban pyni nam ïa ki mar rep ba ki pynmih bad ki kyrmen ruh ba ha ki snem ban dang wan kane ka tamasa kan dang ïai bteng.
Ki nongwan peitkai ba wan na kylleng ka Ri Khasi ki pynpaw ka jingsngewnguh ïa ka shnong Mawsadang kumjuh ka Ïatreilang Foundation (IF Farm) ba la shim ïa kane ka sienjam ban lum ban lang ïa ki nongrep bad ban nang pynshlur ban pynneh ïa ki rukom rep tynrai.
Haba ioh ban ïakren ïa u Bah Khrawborlang Lyngdoh Secretary ka Ïatreilang Foundation (IF Farm) u la pynpaw ka jingsngew kmen ba ki nongrep jong ka thaiñ ki ai ka jingkyrshan da kaba ki la wan ban ïashim bynta ha kane ka ïew nongrep.
Shuh-shuh u la ïathuh ba ka IF Farm ka don jingthmu ruh ban dang ïai bteng ban pynlong ïa kane ka jingïakynduh lang jong ki nongrep ha ki snem ki ban sa wan.
Ha kane ka sngi kum ka dak ka jingkynrshan bad ban ai mynsiem ïa ki nongrep ka IF Farm ka la ïoh ban sam ïa ki symbai jhur sha ki nongrep khnang ba kin lah ban nang pynbha bad pynheh pynïar ïa ka kam rep jongki.
