Nongstoiñ, Lber 15
Ka Kyrsiew Pynroi Agro-Farming Development Organization (KPADO) bad ka Meghalaya State Skill Development Society, lyngba ka scheme Inter State Border Area Development Program 2025 – 2026 ha ka sngi Saitjaiñ jong ka taïew ki la ïoh ban pynlong ïa ka prokram ai jinghikai ha ka kam ri ngap, thung jingthung bad ka jingshna ïa ki jingbam mrad kaba katkum ka juk stad ba mynta ha ki katto katne tylli ki shnong khappud kynthup ha ka shnong Umwahlang, Mawsikar, Tynghor, Aradonga, Athiabari bad kiwei kiwei.
Ïa kane ka prokram la sdang naduh u bnai Kyllalyngkot 2026 bad Rymphang 2026 ter ter bad la ong ba ka jingthmu ba kongsan jong kane ka jingai jinghikai ka long ban ïarap ïa ki paid nongshong shnong ka jylla Meghalaya kiba sah ha ki khappud ba kin lah ban pynheh ïa ka kamai kajih jong ki, khnang ba kin pahuh ka kam ka jam bad ba kin ïaineh ha ki shnong ki thaw kaba ki shong ki sah.
Na ka liang ka KPADO myn ha ka13 tarik u Lber 2026 ka la ïoh ban sam ïa ki syrnod ryngkat kiwei kiwei ki tiar kiba donkam sha kiba la wan ban ïashimbynta ha kum katei ka jingai jinghikai kiba la poi ruh haduh 129 ngut tam.
U Bah J Rngaid, Branch Manager ka MRB Athiabari haba kren ha kane ka sngi u la ai ka jingïaroh ïa ka KPADO, MSSDS bad ïa baroh kiba la shah hikai kiba ïoh ruh ïa ka jinghikai ka ban plie bun ki lad sengkam seng jam lajong.
U la kyntu ba kin don ka account kaba tista, bad ong ruh ba ka liang jong u bad ka Bank MRB ki kloi ha kano kano ka por ban ai jingïarap ïa kiba donkam ban sengkam bad pynheh ïa kino kino ki kam.
Ha katei ka jingïalang la ïadonlang ryngkat ki ophisar ka Meghalaya State Skill Development Society (MSSDS) West Khasi Hills kynthup ïa u S Kumar, Bah Bonney Kharbani, President ka KPADO, ki sordar jong ki shnong, ki riew rangbah jong ka thaiñ bad kiwei kiwei.
