Khliehriat, Lber 15
Ka District Medical and Health Officer (DMHO), East Jaiñtia Hills District ha ka 14 tarik Lber kala pynlong ïa ka Community Outreach and Sensitization Health Camp ha ka phang pdeng “Every Mother Matters, Every Child Counts” ha Saipung PHC, East Jaiñtia Hills District.
Ha kane ka prokram la wan ïashim bynta da ka Assistant Commissioner ka East Jaiñtia Hills District ka Kong F. Wann, MCS, ha ka jingïadon lang ka District Immunization Officer (DIO), East Jaiñtia Hills District, ka Dr N. P. Suchiang, District Surveillance Officer, Dr L. Sungoh, Medical & Health Officer (M&HO), in-charge Saipung PHC, Dr R. Siangshai, nalor kiwei kiwei.
Ka Kong F. Wann, MCS ha ka jingkren kala ong, ka jingkiew jong ka imlang sahlang ka shong shibun eh ha ka koit ka khiah jong ki longkmie, da kaba pynksan ba ka kmie kaba koit ba khiah ka ïalam sha ka longïing kaba koit ba khiah bad ki khun kiba koit ba khiah, kaba ha kaba kut ka ïarap ïa ka roi ka par jong ka district bad ka jaidbynriew.
Kala ai khublei ruh ïa ka jingaiti lut bad ka jingtrei shitom jong ki doktor bad ki nongtrei ka koit ka khiah kiba shakri ha ki Primary Health Centre (PHC) bad ki sub-centre bapher bapher ha kylleng ka district.
Ka Kong Wann ka pynpaw ba bun ki briew ha ka thaiñ Saipung ki shaniah ha ka rep ka riang na ka bynta ka jingim jong ki bad ki ju bunkam ha ki kam ha ki lyngkha, kaba teng teng ka pynlong ïa ki ban iehnoh ïa ka koit ka khiah bad ka jingpeit bniah man ka por bad kumta kala kyntu ïa ki paidbah jong ka thaiñ ban shim kabu pura ïa ki jingshakri ba khlem jingsiew kiba don ha ki jaka treikam Sorkar kum ki PHC, CHC bad ki Sub-Centre na ka bynta ka jingbha jingmiat jong ki bad jong ki khun ki kti jong ki.
Ka la pynpaw ruh ba ka bor synshar District ki don ka jingangnud ban kyrshan ïa ka tnad ka Koit ka Khiah lyngba ka pisa jong ka District Mineral Foundation (DMF) ha ki liang bapher bapher kum ban kyntiew ïa ki jaka ai jingshakri ha ka koit ka khiah, da kaba kdew ïa ka projek pynneh pynsah ïa ka um ba la pyntreikam ha Saipung PHC kaba pynlah ban lum ïa ka um slap ha ka por slap, ryngkat bad ka jingpynbiang ïa ki lad pynkhuid ïa ka um ha ka por slap.
Ka District Immunization Officer (DIO), East Jaiñtia Hills District, ka Dr N. P. Suchiang ha ka jingkren jong ka, ka la pynpaw ba ïa kane ka Camp ai jingsumar la pynlong da ka jingkyrshan jong ka Directorate of Health Services (DHS) da ka jingthmu ban pynduna ïa ka jingïap ki longkmie bad ki khyllung.
Ka la pynpaw ba ka jingpeit bniah ïa ki jingpang bym lah ban saphriang (NCD) kum ka blood pressure, jingpang shini bad jingpang cancer la pynlong na ka bynta ki briew kiba la don 30 snem shaneng.
Ka la kdew ruh ba ïa ka jingpang breast cancer screening la leh da ka kynhun ki nongsumar na Civil Hospital Ialong bad ba ki khynnah, ki longkmie, ki tymmen bad ki longkmie ba armet ban leh ïa ka screening ha kane ka camp khnang ban ïarap ban lap ïa ki jingpang kiba lah ban nym paw dak ha ka por ba dang sdang.
Ka la pynshlur shuh shuh ïa ki kynthei armet khamtam ïa kito kiba don ha ka jingma kaba khraw ba kin shim kabu namar ba ki doktor kiba tbit ki don ha ka por ba pynlong ïa ka camp. Ka la kdew ba kum kine ki jaka sumar ki long kiba kongsan namar ki ïarap ban ithuh kloi ïa ki jingeh ha ka koit ka khiah bad ban ai ïa ka jingsumar kaba donkam.
Haba kren halor ka Human Papillomavirus (HPV) vaccination campaign, ka Dr Suchiang ka la pyntip ba ïa kane ka prokram la sdang ha ka District ha ka 7 tarik Lber ha Pamra Paithlu PHC, Khliehriat Civil Hospital bad ha Sutnga CHC, ha kaba kumba 50 ngut ki khynnah kynthei kiba la ïoh ïa ka tika ha ka rta kaba 14 haduh 15 snem ka rta.
Ka la pynshai ba ka jingai dawai HPV ka ïarap ban ïada na ka jingpang cervical cancer bad la pyndonkam ha ka pyrthei baroh kawei naduh u snem 2006. Ka la bynrap ba kane ka jingai dawai kan bteng haduh lai bnai bad ba kane ka dawai ka don ha ki PHC ha kylleng ka district ban ïada ïa ki khynnah kynthei na ki jingpang ba ïadei bad u HPV.
Ki jingshakri ha ka koit ka khiah kiba la pynbiang ha kane ka jaka ai jingsumar ki kynthup ïa ka jingtest ïa ki jingpang ba ïabit na ka jingshongkha khleh, ka jingpeit bniah ïa ki jingpang bym lah ban saphriang (NCD), ka jingai tika ïa u khñiang jingpang Human Papillomavirus, ka jingpynrung kyrteng ïa ka Ayushman Bharat, ka jingpeit bniah ïa ki jingpang bad kiwei kiwei.
