Shillong, Lber 15
Ka bor district ka East Khasi Hills kala pynmih ïa ka jingbthah paidbah ba maham ba ka lah ban don ka jingpom pyrkhat, pom leilieh, hap phria, ‘erïong bad u slap ba jur ha kine ki khyndiat sngi ban wan katkum ka jingbatai antad (forecast) jong ka India Meteorological Department (IMD).
Katkum ka jingbthah bala pynmih da ka ophis ka Deputy Commissioner, ka jingsniew ka suiñbneng ka lah ban jur bha hapdeng ka 15 tarik Lber bad 19 tarik Lber ha kylleng ki jaka jong ka District.
Ka jingbatai antad ka pyni ba ha ka 15 tarik Lber, yn sakhi ïa ka jingpom pyrthat uba wan lang bad ka leilieh, u slap ba jur, u phria bad ka lyer kaba jur kaba kot haduh 40-50 km/ph ka jingsted, ha ki katto katne ki jaka.
Ha ka 16 tarik Lber, u pyrthat bad ka leilieh ryngkat ka lyer ba ïaid 30-40 km/ph bad u slap ba jur, la khmih lynti ban don ha ki katto katne ki jaka.
Ha ka 17 tarik Lber ka IMD kala batai antad ban don ka jingpom pyrthat bad leilieh bad u slap bad ha ka 18 bad 19 tarik pat lah ban mad ïa ka jingpom pyrthat bad leilieh.
Ka bor district kala kyntu ïa ki nongshong shnong ba kin long phikir bha bad ban shim ïa ki lad jingshngaiñ ha kum kane ka por ka bym long thikna ka suiñbneng.
La bthah ïa ki nongshong shnong ba kin pyndait skhem bha ïa ki mar kum ki tin sop ïing, ki mawit, ki signboard bad kiwei ki tiar kiba lah ban shah rong ha ka lyer kaba khlaiñ. La bthah ruh ba kin pynlip ïa ki tiar ilektrik ha ka por ba pom leilieh bad kiar ban ïeng marjan ki post ilektrik lane ki sainar bording.
Ki briew kiba sah marjan ki wah la bthah ba kin husiar bha ïa ka jingwan poi kynsan ka umsaw ha ka por ba jur slap. La bthah ïa ki briew ba kim dei ban jam ïa ki wah, ki nala, ki kshaid namar ki lah ban long ka jingma.
