Jowai, Lber 15
Kam long kaba suk ïa ka Sorkar ban aikam aijam lut ïa baroh ki samla kiba la pyndep ïa ki kyrdan pule bapher bapher, hynrei watla katta ka Sorkar kala shim ïa bun ki lad ki lynti ban ïaleh kumno ban pynïoh kam ïoh jam ïa ki samla nalor ki kam Sorkar.
Ïa kane la ong da u Symbud Myntri Rangbah ka Jylla Ma Sniawbha-lang Dhar haba kren haba wan ai mynsiem bad kitbok kitrwiang ïa ki samla shynrang bad kynthei kiba la pyndep ïa ka jinghikai Security Guard bad Bouncer ha ka shlem ai jinghikai MPSS Security Agency Training Centre kaba ha Thadmuthlong-C Phramer, West Jaiñtia Hills District.
Ïa kane ka shlem MPSS Security Agency Training Centre la dei trai da u Ma Pyndaplang Muksor uba dei u pulit (Battalion) hynrei uba la iehnoh ïa kane ka kam bad wanrah da ka shlem hikai khnang ba ki samla kin ïoh lad ban trei ha ki kam bapher bapher.
Ki samla baroh kiba la pyndep ïa ka jinghikai kaba neh 45 sngi lynter, ki long 67 ngut kynthup 47 ngut kiba la pyndep ïa ka jinghikai ban long ki nongap pahara ne Security bad 22 ngut kiba la pyndep ïa ka Bouncer.
Haba bteng ïa ka jingkren, u Ma Sniawbhalang Dhar u la ong ka jingkyrduh kam hapoh ka jylla ka jur bha namar katkum ka jingkheiñ ki don haduh 70 hajar ngut ki samla kiba kyrduh kam kyrduh jam ha ka shi snem bad katba nang ïaid ki snem kane ka dang kiew shuh shuh.
Ban teh lakam ïa ka jingkyrduh kam, u la ong ba ka Sorkar MDA ka ïaleh ban wad ki lad ki lynti na ka bynta ki samla da kaba pynmih ïa ki prokram bapher bapher kum ka Focus, CM-Elevate, Prime Hub, ki Mission bapher bapher nalor ki subsidy na ki skhim Sorkar bapher bapher ban pynshlur ïa ki samla ban ïeng ha la ki jong ki kjat bad ha kajuh ka por kan ïarap ïa ki samla ban lait na ki kam sniew ba bun jait.
Ïa ka jingpynbam smai ïa ki samla la pyndep da u Managing Director Ma Pyndaplang Muskor ha ka jingdonlang ki bahaïing hasem jong ki samla, ki nongïalam shnong nalor kiwei kiwei kiba shah khot sngewbha.
Kiwei de kiba la ai jingkren ki long ka Emelya Momin, Assistant Deputy Commissioner, West Jaiñtia Hills District, u Waheh Shnong Thadmuthlong-C Phramer Ma Manbha Lyngdoh ha ka jingïalang ba la pynïaid da ka Kong Iohbyntalang Bhoi.
La pynphuh pynphieng ïa kane ka sngi da ka jingïashim bynta ki smala ha ka jingïaid march Pass, ki jingrwai bad jingshad pynbyrngia bad shad Drill.
