Shillong, Lber 15
Ka Jylla ka la duh noh ïa kawei ka ‘thei ïalehkai athletics, ka Ritina Hanse kaba dang ha ka rta kaba 23 snem, hadien ba ka la ngat ha ka jingjia ïatakhuh kali ha Sumer, Ri Bhoi District myn ha ka sngi Saitjaiñ.
Kane ka samla kaba dangsan bha ha ka kam ïalehkai bad kaba dangshah pyntbit hapoh ka shlem ai jinghikai jong ka Sports Authority of India (SAI) Training Centre, ka la wanrah burom da kaba khur takma na ka bynta ka dong bad ka thaiñ Ri Bhoi hi baroh ha ki lympung ïalehkai bapher bapher kynthup ha ka Meghalaya Games. Ka la khur takma ruh ha ka All India Inter SAI Athletics Champion-ship 2025 kaba la long ha Patiala, kumjuh ha ka 2nd North East Olympic Games 2022 ha Shillong bad ha ka 3rd North East Games 2024 ha Kohima.
Ka Ritina ka dei ruh ka samla kaba dangdon ruh ha ka prokram jingpyn-khreh (coaching camp) na ka bynta ban mihkhmat ïa ka Jylla ha ka 39th Natio-nal Games ka ban long ha u 2027 ha Meghalaya.
“Ka long ka jingsngew -sih kaba khraw halor ka jingduh noh ïa ka nong-ïalehkai ba tbit. Ngim lah ban klet ïa ka jinglong jong ka ha ka kam ïalehkai. Ka Ritina na Ri Bhoi District, ka la aiti met bad mynsiem ha ka kam ïalehkai jong ka,” la pynpaw u District Sports Officer (DSO) ka Ri Bhoi District u Bah Bobby L. Nongbet ha ka kyrwoh.
“Ka Ri Bhoi District ka dap da ka jingsngewsih kaba khraw halor ka jingduh noh ïa ka nongïa-lehkai ba paw, kaba la khlad noh ha ka por kaba lyngkot. Hynrei ki jingjop bad ka jingaiti lut jong ka kin ïai sah kynmaw junom. Te kumta ngi phah ka jingsngewlem sha kiba haïing ha sem bad ba U Blei un ai jingtngen ïa ki ha kum kane ka por ka jingwan kah u lyoh uba dum ïa ka ïing jong ki bad ruh ba un ai ka jingjahthait ïa ka mynsiem ka jong ka.”
Lah ban pynpaw ba katei ka jingjia ïatakhuh kali ka la jia bad kawei ka trok ha ka por ba ka dangshong da ka scooty lem bad u hynmen jong ka, u Celestial Hanse (27 snem) uba la ngat ha ka jingmynsaw kaba malu mala.
Ïa ka met kaba sah jong ka yn pyndep mynta ka lah sngi U Blei ha ka shnong Khamar, Ri Bhoi District.
Na ka liang ka Megha-laya Athletics Association (MAA) ka la pynpaw ïa ka jingsngew kyndit bad pynshaïong ïa baroh ki dkhot jong ka synjuk hi baroh kawei,namar dang ha kine ki sngi ka dangdon ka prokram ai jinghikai (coaching camp) na ka bynta ka jingpynkhreh ïa ka National Games 2027.
“Ka la long shisha ka khynnah ba trei shitom bad minot ha ka jingïa-lehkai athletics , ïa kaba ka la mihkhmat la bun snem ha ki lympung ïakop national, zonal bad kiwei kiwei ki jingïakop bad ka la jop ha kiba bun ki jingïalehkai. Ka jingkhlad jong ka, ka la long ka jingduh ïa ngi kum ka synjuk bad ka Jylla hi baroh kawei,” la pynpaw u Secretary ka MAA u Bah Finely Lad Pariat.
Te kumta u la phah ruh ka jingsngewlem sha kiba haïing hasem kiba la mad ïa kane ka jingjia kaba snewsih. “To U Blei Trai Kynrad un long ryngkat bad ki baroh un ñiad ïa ki ummat kthang bad un pynshaitbor ïa ki. Leit suk Ritina,” la bynrap biang u Bah Pariat.
