Washington, Lber:
Katkum ka kaiphod ba la ioh lum, la paw ba dei u ‘namding jong ka United States uba la leit hap bad bthei ha ka skul ha Minab jong ka Iran, kaba la wanrah ia ka jingiap jong 175 ngut ki briew, kiba kham bun ki dei ki khynnah.
Katkum ka jingtohkit bad jong ki shipai la lap ba u ‘namding Tomahawk uba la pyn julor ia ka iing jong ka skul jong ka Shajarah Tayyebeh ha ka 28 tarik u Rymphang, ka dei ka jingbakla thew jong ki shipai ka US. Shuh shuh, ka US ka dei tang ma ka hi ka ri, kaba iadon bynta ha katei ka thma bad kaba pyndonkam da ki namding Tomahawk.
Ki heh ka tnat shipai US, ki iathuh ba ia katei ka thong ba la dep thmu lypa, ha katei ka jaka ba don ka skul mynta, la thmu bad pynbeit da kaba pyndonkam ia ki jingtip kiba la rim ba la ioh na ka tnat Central Command jong ka US bad kumta la ong ba dei kane ka jingbakla kaba la pynlong ia u ‘namding ba un leit hap beit-beit sha katei ka jaka ba la thmu. Ia kane ka jingtip la ai da ka tnat wad bniah jong ka tnat iada ri ka US. Nalor kata, ka jingtohkit ka dang ïaid ruh halor ka rukom treikam jong ka tnat National Geospatial-Intelligence Agency, kaba peit bniah ïa ki dur satellite jong ki jaka ba lah ban shah thombor.
Ki heh sorkar ki la iathuh ba ka jingtohkit ka dang iaid shakhmat ba balei kim shym la peit bniah bha shwa ia ki jingtip kiba dei hok, hashwa ba kin shim ia katei ka rai ban thombor ia katei ka jaka.
Kane ka skul ka don ha kajuh ka thaiñ bad ka kynhun shipai duriaw jong ka Iran, kaba iajan bha bad ka ktem shipai jong ka US. Ha kaba sdang, katei ka iing kam dei ka skul bad ka dei ka bynta jong ka jaka sah shipai, hynrei naduh ki snem 2013 haduh 2016 la ker bha noh bad pynlong noh ruh ia katei ka jaka.
