Tura, Lber 15
Ka Garo Hills Autonomous District Council (GHADC) kan shong ïa ka Dorbar Kyrpang lashai ka sngi, ka 16 tarik Lber ban thep ïa ka ‘vote’ ‘No Confidence Motion’ (NCM) hadien ba u Lat ka Jylla u la ïoh pdiang ïa ka dorkhast ba la soi da ki 21 ngut ki MDC kiba la pynpaw ba ki la duh jingshaniah ha u CEM, u Albinush Marak.
Kham hashuwa, hynnin ka sngi, ka 14 tarik u Lber, la dep ban aiti ïa ka shithi sha u Lat halor katei ka kam ban kyrpad ïa ka Dorbar Kyrpang – kaba la shah da u Lat ha ryngkat ka District Council Affairs (DCA) kaba pynbna ïa katei ka hukum.
Ka hukum ka la kdew ba ha kaba pyndonkam ïa ka bor ba la bynshet katkum ka ‘sub-rule’ (5) jong ka Rule 36 jong ka ‘Assam and Meghalaya Autonomous Districts (Constitution of District Council) Rules’, 1951, kumba la pynkylla da ka GHADC, u Lat ka Jylla u khot ïa ka Dorbar ha ka 16 tarik u Lber ha ka por 11 baje mynstep ha District Council Hall, Tura na bynta ka jingpynïaid ïa ka jingbishar katkum ka Rule 22 (1) bad ki kam kiba hadien katkum ka jingdonkam.
U Chairman ka GHADC un pynïaid ïa kane ka Dorbar ba la kdew haneng katkum ki kyndon ba ïadei jong ka ‘Assam and Meghalaya Autonomous (Constitution of District Councils) Rule’, 1951.
