Shillong, Lber 15
Namar ka jingban ka jingduk ka la pynlong ïa ki longkmie bad longkpa ba kin hap leit trei kum ka kam ap pahara ne security ha Bangalore.
Ym tang katta, namar bym biang ka bylla, ki don ki longkmie kiba ban ka jingduk ki hap ban leit shong ïingbriew ha Guwahati bad Shillong.
Haba pynthikna la ïoh ban ïakren bad u Paiem Kynsai N Syiem, Syiem ka Hima Bhowal uba dei u dkhot ka Balat Border Haat Management Committee ka East Khasi Hills district u la ïathuh ba naduh ba khang ka Balat border haat, ki longkmie bad longkpa kiba kitnong kiba kamai shi hajar tyngka shi sngi ki la hap leit wad bylla shaduh Bangalore ban trei security tang ban pyndap ïa ka ïing ka sem.
U la ïathuh, kine ki longkmie bad longkpa ki dei na Tilagoan kiba la don ki khun ki kti namar kim banse tang ban pyndap ïa ka ïing ka sem.
U la pynpaw ba ki nongbylla kitnong haba ki kamai shi hajar shi taïew ka jingmyntoi ïa ki hynrei u kyrmen ba lada plie biang ka Balat border haat kan sa wanphai biang ka ïoh ka kot ha ka thaiñ.
U don jingkyrmen ba ka Sorkar thymmai ka Bangladesh ba la ïalam da ka BNP kan plie noh ïa ka Balat Border Haat kaba don pyrshah ïa ka Sunamganj district ha Bangladesh.
U Paiem u la ïathuh ba ka jingkhang ïa ka Balat Border Haat bad kiwei ki haat bad ka ri Bangladesh ka la sdang naduh ba ïakhih ha Bangladesh ha u bnai Nailar snem 2024 haduh ban khyllem ka Sorkar ba la ïalam ka Sheikh Hasina.
U la ong ba un sa pynsngew sha u Chairman ka Haat Management Committee East Khasi Hills ba un pynsngew ïa u Deputy Commissioner ka Sunamganj district Bangladesh ban plie noh ïa ka haat ha Balat.
U la ong ruh ba un pynsngew ha u Chairman ka haat Management Committee ban pyntip sha ka Sorkar Jylla ba kan ïakren ïa ka Sorkar India ba kan ïakren ïa ka Sorkar Bangladesh.
U Paiem Kynsai u la ïathuh ba naduh ba la khang ka border haat ka jingduhnong ki nongrep, ki nongkhaïi kiba dei ki vendor bad ki nongthied kiba dei ki vendee.
U la pyntip ba wat ki paidbah na Bangladesh ki la duhnong naduh ba la shah khang ka Border Haat ha Balat namar ïa ki mar jong ki ym lah ban pynïaid ïew shuh sha India.
U la ong ha India kiba duhnong ki dei ki nongdie sha, nongkit daju, ki nongbylla sngi bad ki nongkamai kali.
