Lebanon, Lber:
U nongialam ka Hezbollah, u Naim Qassem ha ka Sngi Thohdieng u la ong ba ka kynhun shipai jong u, ka long ba la pynkhreh ban ïakhun pyrshah ia ki shipai jong ka Israel bad kane ka khubor ka long hadien ba ka Israel kan pynjulor lut ia ka ioh- ka kot jong ka Lebanon, da kaba thombor ia ki shlem treikam bad ki jingtei bapher jong ka Lebanon.
Ka Lebanon ka la phai khmat lang sha ka thma Middle East hadien ba katei ka kynhun lehnoh Hezbollah, kaba ju ioh jingkyrshan na ka Iran, ka la leit thombor ia ka Israel halor ka jingshah pyniap jong u nongialam ba hakhlieh duh jong ka Iran- u Ayatollah Ali Khamenei, ha ka jingleit hiar thma jong ka US bad Israel sha Iran.
Kumta, utei u nongialam jong kane ka kynhun lehnoh na Lebanon, u la ong ba ka Hezbollah ka long ba la pynkhreh ban ïakhun pyrshah ia ka Israel bad ba ka Israel kan sa shaïong ngaiñ ynda ka Lebanon ka la pyni da ka bor ba shisha jongka.
u Qassem u la ong “Kane ka dei ka thma kaba la don dak lypa la slem , ym ka thma kaba rit ne kaba malu- mala.”
Ka Israel, ha ka Sngi Thohdieng, ka la pynpra ia kawei ka jingkieng kaba don halor ka wah Litani, kaba don hapdeng ka shnong Zrariyeh bad Tayr Falsay, ong ka khubor jong ka National News Agency jong ka sorkar Lebanon. Ka wah ka pyniakhlad ia ka bynta ba shathie jong ka Lebanon, na mihngi sha sepngi.
Ha ka jingpynbna, ki shipai Israel, ki la batai ia katei ka jingkieng, kum ka “jingkieng kaba kongsan” na ka bynta ka Hezbollah “na ka thain mihngi sha ka thain sepngi jong ka Lebanon, ban tei ia ka bor jong ka bad ban pynkhreh ia ka jingiakhun”.
Kane ka jingshah thombor ka dei ka sien kaba nyngkong ïa ki jingtei paidbah jong ka Lebanon ba la kam da ka Israel naduh ba la sdang ka thma Middle East.
“Kane ka dei tang ka jingsdang bad ka sorkar Lebanon bad ka jylla Lebanon kin siew ia ka dor kaba kiew ha ka jingpynjot ia ki jingtei jong ka ri Lebanon ba la pyndonkam da ki lehnoh Hezbollah”, la ong u myntri kam pohiing ka Israel, u Israel Katz, ha ka Sngi Thohdieng.
U la ong ba ka Lebanon, kan mad ia ka jingduhnong kaba khraw, tad haduh ba kan da pyndep ia ka jingkular jongka, ban weng ia ki tiar ialeh jong ka Hezbollah.
Ha kaba sdang jong kane ka taiew, u President ka Lebanon, u Joseph Aoun, u la tyrwa ban iakren markhmat bad ka Israel, hynrei ha ka sngi Palei, u la ong ba um shym la ioh jubab eiei.
