Shillong, Lber 15
Ka shlem treikam jong ka Sports Authority of India (SAI) Training Centre ha ka sngi U Blei ka la pynlong ka jingleh burom khatduh halor ka jingkhlad noh ka ‘thei ïalehkai athletics ka samla (L) Ritina Hanse, kaba la khlad noh ha ka jingjia ïatakhuh kali myn ha ka sngi Saitjaiñ.
Kane ka ‘thei ïalehkai ka la ngat ha katei ka jingjia ha Sumer, Ri Bhoi District ha ka por ba ka dangthmu ban wanphai sha kane ka shlem ai jinghikai na ka jingleit shuti sha la ïing kumba katto katne sngi.
Ha kane ka sngi ki bor ba dei khmih jong kane ka shlem ai hikai hapoh ka jingïalam u Assistant Director u Rajnish Kumar Mishra, ryngkat ki nongtrei, ki coach bad ki khynnah ki la pynlong ka jingsngap jar kaba 2 minit ha ryngkat ka jingthang mombati kum ka dak ka jingleh burom kaba khatduh ïa katei ka khlur ïalehkai ha ryngkat ka jingïam sngewsih halor ka jingduh noh ïa ka.
Na ka liang kane ka shlem ai jinghikai ka la rai ruh ban sangeh kilanmet ha ka step jong ka lah sngi U Blei khnang ki khynnah ki lah ban ïadon bynta lang ha ka jingleh burom khatduh ha ka ïing sah jong ka kaba ha ha shnong Khamar, Ri Bhoi District.
Kumba ka paw ka (L) Ritina ka la rung sha ka shlem ai jinghikai jong ka SAI) Training Centre ha u snem 2022, ha kaba ka la ïoh ban mihkhmat ha kiba bun ki lympung kynthup ïa ka All India Inter SAI Athletics Championship 2025 kaba la long ha Patiala ha kaba ka la khur ïa ka takma rupa ha ka 200mts bad 400mts lem bad ka takma rnong ha ka 4×100 relay.
Ka la khur takma ruh ha ka 3rd North East Games 2024 kaba la long ha Kohima, kumjuh ha ka Meghalaya Games jong u snem 2022, 2024 bad 2025. Kumjuh ka la khur takma ruh ha ka 2nd North East Olympic Games 2022 ha Shillong.
Ka (L) Ritina ka dei ruh ka samla kaba dangdon ruh ha ka prokram jingpynkhreh (coaching camp) na ka bynta ban mihkhmat ïa ka Jylla ha ka 39th National Games ka ban long ha u 2027 ha Meghalaya.
