Jowai, Lber 15
Ka Raij Jowai kumba ju long manla u snem, ha ka 14 tarik Lber hapoh ka jingpeit jingpynïaid ka Dorbar Niam ka la shim ban pyndep ïa ka lehniam Thohlangdoh ha ryngkat ka jingïashim bynta lang ki shakri niam ka Raij naduh u Doloi, Pator, Langdoh, ki Sangot, ki Wasan, ki Phra Kur bad ki khun ka Raij.
Ïa ka jinglehniam ne kñia ainguh hakhmat ka duwan u Moo Langdoh la pyndep da u Sangot Paswet ha ryngkat ka jingsynranlang u Sangot Pakyntein bad u Sangot Pasubon kiba dei ki lai Sangot jong ka pateng khun pateng ksiew ka Kur Sookpoh Khat-ar Wyrnai.
Kane ka jinglehniam ka long shibynta ban ainguh aidem ïa u Lei Langdoh na ka bynta ki jingkyrkhu ba la ïoh bad ruh ka long shibynta ka jingpynkyntang ki khun ka Raij ïa ka Mei mariang namar ka jingtheh sei ki jingkyrkhu ha baroh ki liang.
Nalor ka jinglehniam ha kane ka sngi, ha ka jingpynïaid u Pator la pynlong ruh ïa ka Dorbar Niam ha kaba la ïashimbynta da ki kñi, ki riew rangbah bad ki khun samla ka Seinraij bad ka mat ba la ïakren ïatai kyrpang ha kane ka sngi ka long “ka bhah ka bynta ki Phra Kur-Phra Kmai ha ka Niam”.
Na ka liang u Dolloi Ma Puramon Kynjing kum u khlieh ka niam khlieh ka Elaka u la ïathuh ba ka nongrim jong ka jingpyndep niam, ka long ba ki khun ka Raij ka shnong ki pyni ka jingburom bad kheiñkor ïa ka Mei mariang kaba la theh sei ki jingkyrkhu ïa u khun bynriew ha baroh ki liang bad ha kane ka sngi katkum ka adong niam ki khun ka Raij kim bit ban trei ban ktah ne ban leh kino kino ki kam da kaba pynjot bad pynsniewdur ïa ka mei mariang bad ki sawdong sawkun jong ka.
Hadien ba la pyndep ïa ka jinglehniam na Law Langdoh, ka bynta ba bud pat jong ki jingshakri niam ynda la poi ha ïing Langdoh ka long ban pyndep ïa ka niam Thung Sang kum ka dak ban pyni ba hadien kane ka sngi ki khun ka raij ka shnong ki la lah ban sdang ïa ka thung ka tep ha kper ha prah ba don ha ki ïing ki sem jong ki.
