Weng noh ka Sorkar ïa ka jingthmu tei fly-over, yn wanrah da ka Four-lane

Shillong, Lber 16

Ka Sorkar Meghalaya ka la pyndam noh ïa ka jingtyrwa ban wanrah da ka ‘fly-over’ bad ha ka jaka jong kane, yn pynheh noh ïa ka surok kaba la don lypa sha ka ‘four-lane’ kata na jingkieng Umshyrpi sha Barik Point. Kane ka la long hadien ka jingïamir jingmut bad ki shipai bad ki Highway Agency hadien ba ki la lap ba ka ‘fly-over’ kan nym lah ban treikam.

“Ka jingtyrwa jong ka surok najrong ka paw ba kan nym long kaba biang. Ngi la rai dang shen ba naduh ka jingkieng Umshyrpi haduh Barik Point yn pynkylla noh sha ka surok four?lane ha ka jaka jong ka surok kaba ïaid najrong,” la ong u Symbud Myntri Rangbah Bah Prestone Tynsong uba bat ruh ïa ka tnad PWD (Roads) haba kren sha ki lad pathai khubor ha ka sngi Nyngkong. U Bah Prestone u la ong ba kane ka jingpynkylla ka long hadien ka jingïalang ba la pynïaid da u Myntri Rangbah ka Jylla u Conrad K Sangma bad ba la don lang ruh u GOC ka tnat shipai.

“Ngi la ïakren ïa baroh ki jingtip ba bniah bad ngi la bthah ïa ka PWD bad ka NHIDCL ryngkat bad ki ophisar jong ki shipai ban don ka jingjurip lang bad ha kaba kut ban wad bniah katno ka jaka ne ka jaka ka donkam. Hynrei la shim ïa ka rai ha kata ka sngi ba ka surok four?lane ka dei ban don ha ka jaka jong ka surok kaba ïaid najrong.”

U Bah Prestone u la ong ba ki shipai ki la mynjur ha ka nongrim ban ai jaka kata ruh tad ynda la dep ban leh shwa ïa ka survey. Halor ka projek surok Shillong-Dawki, u Bah Prestone u la ong ba ka kam ka la ïaid shaphrang ha ka lynti kaba dei.

“Mynta ka kompeni…ka pyrshang katba lah ban pynthikna ba hapoh ka tarik ba la buh ban pyndep ïa ka.”