Jowai, Lber 17
Ka lympung ïalehkai District Cricket League ba la pynïaid da ka West Jaiñtia Hills District Cricket Association (WJHDCA) ka la nangjam shaphrang ha kaba ka Ummulong B bad ka War Jaiñtia United ki la khur jingjop ha ka sngi Ba-ar.
Ha ka jingïalehkai kaba la long ha madan Khliehtyrshi, ka Ummulong B ka la pynliem noh ïa ka Khliehtyrshi da 8 run. Ka Ummulong B kaba la kam trai ban tied nyngkong ka la kamai 165 run bad shah pynhap 9 wiket ha ki 35 over. U kapten ka kynhun u Johneshwa Passah u la tied 43 run, kumjuh u Calmlyone Passah (not out) ula ïoh 24 run bad u Rimiki Laloo (not out) u la ïoh 23 run. Na ka liang ki nongkawang bol ka Khliehtyrshi, u Yoomi Patwet u la khur 5 wiket bad ïa ki 2 wiket la ïoh da u Peter Nongtdu.
Haba beh ïa ka thong, ka Khliehtyrshi SC ka la kamai tang 157 run hadien ba ka la shah pynkhyllem baroh ki nongtied ha ki 33 over. U Ibormiky Suchiang u la tied 51 run, katba u Evilin Challam (not out) u la ïoh 25 run. Na ka liang ki nongkawang bol ka Ummulong B, u Johneshwa Passah u la khur 5 wiket bad ïa ki 3 wiket la ïoh da u Kyndailad Kharbina. Ïa ka nam Man of the Match la khur da u Johneshwa Passah.
Haba phai sha kawei pat ka jingïakhun ha madan Wahïajer Mini Stadium, ka War Jaiñtia United ka la jop da 155 run ïa ka Evergreen Mukhla Mission. Ka War Jaiñtia United kaba la tied nyngkong, ka la kamai 225 run bad shah pynkhyllem baroh ki nongtied ha ki 33.3 over. U Rangehbok Lyngdoh Talang bad u B. Wanso ki la tied mar 47 run, katba u Stefan Surong u la ïoh 20 run. Na ka liang ki nongkawang bol ka Evergreen Mukhla Mission, u Shoristar Suna ula khur 4 wiket bad ïa ki 3 wiket la khur da u Kerborlang Nongrum.
Haba beh ïa ka thong, ka Evergreen Mukhla Mission ka la shah pynkhyllem baroh ki nongtied bad kamai tang 70 run ha ki 23 over. U Shoristar Suna u la tied 25 run. Katba ki nongkawang bol ka War Jaiñtia United, u Phrang Khyriem bad u B Wanso ki la khur mar 3 wiket, katba ïa ki 2 wiket la ïoh da u Skhemdiam Suting. Ïa ka nam Man of the Match la ïoh da u B. Wanso.
