Mairang, Lber 17
Ki paidbah nongshong shnong bad ki nongrep na ka shnong Pyrda, Pyrda Thymmai, Mawiong Mawria, Mawiong Nongthliew bad kiwei ki shnong ba marjan kiba hap hapoh ka Eastern West Khasi Hills District ki la mad ïa ka jingsngewsih kaba jur na ka jingther jong u phria ha ryngkat u slap, ka eriong ha kaba la ong ba bun ki tin sop ïing jong ki ïingbriew bad kumjuh ruh ki mar rep kum ki soh bad ki jhur ki la julor.
Ka khubor ka ong ba kane ka jingwan jong u phria, u slap bad ka eriong kala jia myn ha ka noh phai sngi jong ka 15 tarik u bnai Lber 2026.
Katkum ka tyllong khubor ba la ïohlum na katto katne ki nongïalam shnong ha kitei ki thaiñ la ïathuh ba ka jinghap u phria uba jur bha ka la sdang ha ka por 12 baje bad ka neh haduh kumba 10 minit eiei uba la wan ha ryngkat u slap bad ka eriong.
Shuh shuh la ong ruh ba u tei u phria ula ther ïa ki bynta jong kitei ki shnong ha kaba ki jingthung jingtep baroh naduh u phan, u kajor, u sohplum bad kiwei ki jait jingthung ki la julor lut khamtam eh ki don ki ïing briew kiba ki tin sop ïing jong ki, kila pei lyngba.
Ha kaba ïadei bad kane ka jingshah ktah jong ki mar rep, bad ki ïing ki sem la ïathuh ba na ka liang ki Sordar ki la dep ban pyntip mar mar sha ka ophis jong ka tnad Agriculture bad Block Mairang ha kaba ki la leit ban jurip ha ka Sngi Nyngkong ka 16 tarik u bnai Lber 2026 bad ban shim jingkheiñ ïa ki lanot ba la shah ktah ha katei ka jingwan lynshop jong u phria.
