Shillong, Lber 17
Ka Sputnik CC bad ka Nongmynsong ki la khur jingjop ha ka lympung ïalehkai Late P.A.Sangma Memorial T20 Cricket Tournament 2026 ba la pynlong da ka Shillong Cricket Association (SCA) ha ka sngi Ba-ar.
Ha kane ka jingïakhun kaba ka long ha madan ïalehkai kriket jong ka MCA ha Polo, ka Nongmynsong ka la pynliem noh ïa ka Sputnik Spartan CC da 79 run. Ka Sputnik Spartan kaba la jop ïa ka kynting pisa, ka la ailad ïa ka Nongmynsong ba kan tied nyngkong ha kaba ka la kamai 152 run bad shah pynhap 6 wiket ha ki 13 over. U Pushkar Raj u la tied 48 run na ki 27 bol bad u Arpit u la ïoh 27 run na ki 13 bol. Katba u Hameki Susngi bad u Uttam Chanda ki la khur mar 3 wiket na ka bynta ka Spartan.
Haba wan shimti ïa ka pali kaba ar, ka Sputnik Spartan ka la kamai tang 79 run bad shah pynhap 9 wiket ha ki 13 over. U Bappan Dutta u la tied 32 run na ki 21 bol. Katba u Anish Charak u la khur 3 wiket bad ïa ki 2 wiket la ïoh da u Raghav Magotra. Ïa ka nam Player of the Match la khur da u Pushkar Raj Singh.
Haba phai sha kawei pat ka jingïakhun kaba ar, ka Sputnik ka la jop da 116 run ïa ka MLP. Ka Sputnik kaba la shimti ban tied nyngkong ka la kamai 197 run bad shah pynhap 7 wiket ha ki 20 over. U Swarajeet Das u la long u nongtied uba kynsai ha kaba u la ïoh ban khyrwit 98 run na ki 59 bol bad u Kshittij Singhania u la ïoh 34 run na ki 21 bol. Katba u Pankaj Sharma u la khur 3 wiket bad ïa ki 2 wiket la khur da u Sylvester Mylliempdah.
Haba wan beh ïa ka thong, ki nongtied ka MLP ki la shah pynkhyllem baroh bad kamai tang 81 run ha ki 19.5 over. Kane la wan lyngba ka jingïalehkai bha da u Nafees Siddiqui uba la khur 4 wiket bad ïa ki 2 wiket la ïoh da u Subham Mandal. Katba u Ganesh Sahani u la tied 25 run na ki 32 bol. Ïa ka nam Player of the Match la khur da u Swarajeet Das.
