Tura, Lber 17
U Superintendent of Police ka West Garo Hills u Abraham T Sangma u la pyntip ba ki pulit ka WGH ha ka 16 tarik Lber 2026 ki la ïoh bat ïa ki kali kiba kit ïa ki briew kiba rah ryngkat bad ki tiar pynmynsaw bad thmu ban leit sha ki thiañ ri thor ka WGH ba la suba ba lehse ki thmu ban pynkulmar.
Ïa kine la ïoh bat katba ki pulit ki dang pynlong ka jingtalasi kali ha Aramile kaba don ha Tura, katba ki pulit ki dang pahara bha ha katei ka thaiñ khnang ban pynneh ïa ka shongsuk shongsaiñ ban lait na ka jingmih biang ki jingkulmar ha katei ka thaiñ bad katba ka jingpynjari korphiw ha katei ka thaiñ ka dang ïai bteng.
Ha ka por ba ki pulit ki la talasi ïa kine ki kali, ki la lap ïa ki tiar pynmynsaw ba kynthup ïa ki wait, ki tyrnem, ki nar rod, ki jri siat, bad kiwei pat ki tiar pynmynsaw kiba la suba ba ki thmu ban pyndonkam katba dang don ka jingïakynad ha ka District.
Ki pulit ki la bat noh ïa kine ki briew bad ki la shim noh ïa kitei ki tiar bad haba la tohkit ïa ki, ki la kynnoh ba ki thmu ban leit sha ki thaiñ ri thor hadien ba la pynshit ïa ki da kawei ka sengbhalang ba la tip kum ka Achik.
Ki pulit ki dang peitbniah ruh ïoh dang don ki jingthmu kum kine ha kiwei pat ki jaka ne ki lynti ha ka District.
Ki pulit ka WGH ki dang ïai pynkhlaiñ ïa ka jingpeit pyrman ha ka District bad ban talasi ha ki ba bun ki jaka ban ïada na ka jingmih biang ki jingkulmar ha ka thaiñ, bad ki la kyrpad ruh ïa ki paidbah nongshong shnong ba kin ïatreilang bad ban pyntip sha ki pulit lada ki ïoh jingtip lada don kano-kano ka jingsuba ïa kino-kino kiba thmu ban pynmih biang ka jingkulmar ha ka District.
Ki paidbah ki lah ban pyntip ha ki Police Station kiba don hajan, ki Outpost, Beat House ne ki Police Control Room ha Tura lyngba kine ki number 88837423053, 7005530510, 9089199064.
