Patna, Lber:
U President ba mynta jong ka seng Rashtriya Janata Dal (RJD) u Tejashwi Prasad Yadav ha ka lah sngi U Blei u la kynnoh ba ka seng Bharatiya Janata Party (BJP) ka pynleit jingmut ha ka jingthied briew bad pyndonkam da ki lad jingpynbor ban pynthikna ïa ka jingjop jong ki 5 ngut ki kyrtong jong ka NDA ha ka ilekshon sha Bihar Rajya Sabha.
Haba kren sha ki lad pathai khubor, u Tejashwi u la kynnoh ba ka BJP ka la pynthut ïa ki rukom synshar paidbah. U la pynskhem ba katba ka Mahagathbandhan ka don ïa ka bor kaba biang ha ka jingkheiñ jingdiah, ka jingthied briew ha ka minit kaba khatduh bad ka jingpynbor ha kaba kut ka la ktah ïa ka jingmih seng.
“Ngin ym dem khrup bad byrngem ban jubab ïa kane ka kam thok ha ka ïingbishar jong ki paidbah”, u la ong. Haba pynrem ïa ka jingbym lah jong ki lai ngut ki MLA ka Congress bad uwei u MLA ka RJD ban thep vote, u Tejashwi u la pynpaw ba yn sa leh ïa kaba biang pyrshah ïa kito kiba aiti ha ka jingmut jingpyrkhat kaba pyrshah.
“Ka buit, ka jinglong, bad ka dur ba shisha jong ka BJP la ju batai da ka jingpyndonkam bakla ïa ka bor pisa bad ki mashin jong ka sorkar, ka rukom ha kaba ka jingsynshar jong ki paidbah ka Bihar ka la hap ha kane ka kynti,” u la bynrap.
U la pynskhem biang ïa ka jingkular jong u ban bteng ïa ka jingïakhun pyrshah ïa ka rukom pyrkhat jong ka BJP bad u la kdew ba ki 5 ngut ki MLA ka AIMIM bad uwei u MLA ka BSP ki kyrshan ïa ka Mahagathbandhan. “Lymda ki saw ngut ki MLA jong ngi kim shym la shet kylla ïa ngi, ngin jin da la jop tang kawei ka shuki, ïa ka mat kaba ïadei bad ka jingbym don jong ki yn sa ïakren hadien”, u la ong.
U President ka seng Congress ha Bihar u Rajesh Kumar u la kynnoh ba lai ngut ki MLA ka Congress ki la shah rahbor bad shah set hapoh ïing da kaba pyndonkam da ki mashin sorkar, kaba khanglad ïa ki ban thep vote. U heh VIP u Mukesh Sahani ruh u la kynthoh ïa ka BJP, da kaba kynnoh ba saw ngut ki MLA ka Mahagathbandhan ki la shah khanglad ban thep vote.
Haba kynthoh halor ka jingmih, u MP ka BJP u Ravi Shankar Prasad u la ong ba ka jingjop ba shyrkhei jong ka NDA ka pyni ïa ka “jingïatylli kaba skhem kum u mawsiang” jong ka bad buh jingkylli ïa ka jingïatylli jong ka liang pyrshah. U Vijay Kumar Sinha, u Symbud Myntri Rangbah jong ka Bihar, u la pynpaw ïa ka jingkmen halor ka jingjop jong ka NDA ha baroh san tylli ki seat, da kaba ong ba ka liang pyrshah ka ju kynnoh hadien ba ka la shah rem.
U kyrtong jong ka RJD, u A D Singh, u la kdew ba u la ïoh 37 vote, katba u kyrtong jong ka BJP, u Shivesh Ram, u la ïoh 30.
“Hynrei, ka jingkheiñ ïa ki vote ba ar bad ka jingkylla kynsan ha ka jingïakren, ka la pynkylla sha ki jingeh. Kane kaei kaei baroh kam shym long ka bynta ba shahrem, hynrei ka dei ka jingshah rem kaba ïakotdor bad ka synshar paidbah,” u la bynrap.
