Shillong, Lber 17
Ka FIFA, ka paw ba ka la kyntait ban pynkynriah noh ïa ki jingïalehkai jong ka Iran sha Mexico na ka United States ha ka lympung ïalehkai World Cup ka ban long ha u Jylliew mynta u snem.
Na ka liang u President jong ka Iran’s Football Federation u la ong ba ka jingïakren ka dang ïaid ban pynkynriah ïa ki jingïalehkai khnang ban pynthikna ïa ka jingshngaiñ jong ki rangïalehkai jong katei ka ri.
Kane ka wan hapdeng ka jinghiar thma jong ka US bad Israel ïa ka Iran, kaba la thombor kylla ïa ka Israel bad ïa ki ri kiba ïatreilang bad ka US.
Hynrei ha ka sngi Ba-ar, ka FIFA ka la ong ha ka kyrwoh ba ka khmih lynti ba kan pynïalehkai kat kum ka prokram ba la buh.
Ïa kane ka lympung ïalehkai World Cup ka ban sdang naduh 11 tarik u Jylliew haduh 19 tarik u Naitung mynta u snem, yn pynlong da ka US ha ryngkat ka Canada bad ka Mexico.
Ka Iran ka dei ban ïalehkai nyngkong pyrshah ïa ka New Zealand ha ka 16 tarik u Jylliew bad ïa ka Belgium ha ka 21 tarik u Jylliew, baroh ar kine ki jingïalehkai kin long ha Los Angeles, bad ïa ka Egypt ha Seattle ha ka 27 tarik u Jylliew.
Lah ban kdew ba na ka liang u President ka US u Donald Trump u la ong ba ka Iran yn pdiang sngewbha ban shim bynta ha ka World Cup”, um shym la pyrkhat ba kane ka long na ka bynta ka jingshngaiñ jong ki.
“Haba u Trump u la kren shai ba um lah ban pynthikna ïa ka jingshngaiñ jong ka kynhun ïalehkai jong ka Iran, ngim sngew thikna ban ym leit sha America,” la ong u President jong ka synjuk ïalehkai ka Iran, u Mehdi Taj ha ka jingthoh ha social media.
“Te kumta ngi dangïakren bad ka FIFA ban pynlong ïa ki jingïalehkai World Cup jong ka Iran ha Mexico.”
U nongai ktien ka FIFA u la ong: “Ka FIFA ka ïakynduh man ka por bad baroh ki nongmihkhmat jong ki kynhun, kynthup ïa ka Iran, ban ïakren halor ka jingthmu na ka bynta ka World Cup.”
“Ka FIFA ka la khmih lynti baroh ki kynhun ba ki dei ban shim bynta kat kum ka prokram ba la dep pynbeit naduh ka 6 tarik Nohprah jong u snem 2025.”
Kumba ka paw ka Iran, kaba la ïoh rung saw sien lynter sha ka World Cup, ka la rai ba kan ym weng ïalade na kane ka lympung watla ka US ka la pynhap haduh lai tylli ki nam ding ïa katei ka ri.
Na ka liang u President ka FIFA, u Gianni Infantino, u la ong ba u President ka US u la ong ïa u ba ka Iran ka long kaba la pdiang sngewbha ban ïakhun ha kane ka jingïakhun mynta ka aïom lyiur, watla kine ki ri ki don ha ka thma.
Hadien kata, u Myntri ka tnat ïalehkai jong ka Iran, u Ahmad Donyamali, u la ong ba “Ha kano kano ka jinglong jingman ngim don ïa ki kyndon kiba biang ban ïashim bynta ha ka World Cup”.
