Shillong, Lber 17
U Myntri ka tnad Food & Civil Supplies, Bah Methodius Dkhar u la ong ba ka Jylla ka la kyrpad na ka Sorkar Pdeng ban kyntiew ïa ka jingbhah LPG, da kaba kdew ïa ka jingkiew ha ka jinglong-jingman ki kam jngohkai pyrthei jong ka Meghalaya naba ka don ka jingduna ha ki ‘Commercial Cylinder’ na ka bynta ki ‘Hotel’ katba ki skul, ki ‘hospital’ bad ki Anganwadi ki ïoh ïa ka jingïada.
“Ngi la ïakren bad ka tnad Sorkar Pdeng namarba ka Meghalaya ka dei kawei na ki jaka jngohkai pyrthei, bad ngi donkam shuh-shuh ïa ki ‘Commercial LPG’,” la ong u Bah Methodius.
“Ki dang pyrshang ban pynïoh kham bun na ka bynta jong ngi, hynrei kim shym la lah ban pyntikna ïa ngi ïa ka jingpynbiang kaba 100%,” u la ong.
U la ong ruh ba haba phai sha ki longïing (Domestic), kim don kano-kano ka jingshah ktah.
“Ngi la bishar bniah ïa ka jinglong-jingman bad ngi dang pynleit jingmut ha ka jingpynbiang ‘Domestic Supply’ ban pyntikna ba kan ym don jingduna,” u la ong.
Katkum ka kaiphod bathymmai jong ka tnad, ki ‘stock’ LPG (Domestic) ki dap ki biang haduh ka 31 tarik u Lber.
Hynrei haba phai sha ka jingsam ‘Commercial’, ha kawei ka liang, la pynbeit katkum ka jingdonkam ba hakhmat eh ha ka rukom kaba beit ba ryntih.
“Ki skul, ki ‘hospital’ bad ki Anganwadi ki wan nyngkong eh; ki ‘hotel’ kin hap ban khmih hi na bynta katto-katne por,” la ong u Bah Methodius, da kaba kdew “ka jingduna khyndiat hangne hangtai” na ka bynta ka thup kyrdan ‘Commercial’.
