Nongstoiñ, Lber 17
Kawei ka samla na ka shnong Mawkynjoiñ, West Khasi Hills kala jah noh khlem wan phai ïing shuh ha kaba ym shym la tip ka don hangno ne ka leit shaei.
Ka khubor ka ong ba ïa kane ka samla kaba la jah la tip kyrteng kum ka Andalucia Sangriang, khun jong u Bah Nightstar Snaitang bad ka kong Skildaris bad la ong ba kane ka samla kala jah mynta la kumba san sngi ei ei.
Ka khubor na ki bahaïing, la ïathuh ba katei ka samla kaba dang 18 snem ka rta kadei ka khun nyngkong bad kaba dang ap ruh ïa ka risol jong ka klas XII na Sibsingh Memorials Governments Higher Secondary School Nongstoiñ bad la ong ba ka la jah naduh ka 13 tarik sngi Thohdieng ha kaba ki bahaïing hasem ki la shu bna nangne nangtai ba ka leit bylla bad ka la mih na la ïing naduh ka por 9 baje ei ei mynstep jong ka 13 tarik u Lber 2026.
U Bah H.S. Sangriang kñi jong katei ka khynnah u la kyrpad jur ba lada don mano mano ba ïohi ba kin sngewbha ban pyntip lem ha kine ki nomber 60097 74552 bad u 93667. 56187.
Shuh shuh halor kane ka jingjah jong kane ka samla, ka kmie jong katei ka samla ka la ïam paid dohnud ha kaba ka la kyrpad ïa la ka khun ba kan wanphai noh sha la ïing khlem da ïathew bad ban ïamap noh lada kum kren bakla ne kum pyndiaw ei ei da ki kmie ki kpa.
Nangta la ong ruh ba ha kaba ïadei bad kane ka jingjia ki bahaïing ki la dep ruh ban buh ïa ka ejahar ha Police Station Nongstoiñ.
