Shillong, Lber 17
Ka jingkyrmen jong ka Malaysia ban rung sha ka AFC Asian Cup 2027 ka la poi sha kaba kut noh hadien ba ka Asian Football Confederation (AFC) ka la ai 3-0 kol ha ki ar tylli ki jingïalehkai namar ka jingpynrung ïa ki nongïalehkai ki bym biang bad kane ka rai ka la pynskhem ïa ka jingkiew jong ka Vietnam na ka Group-F.
Ka AFC ka la ong ba ïa kane ka sienjam la leh hadien ba ka Malaysia ka la pyndonkam da ki nongïalehkai ki bym dei ha ka jingïalehkai ka wat ba khatduh jong ka jingïa-knieh rung (qualifiers). “Ka nongshah mudui ka la pynïalehkai da ki nongïa-lehkai ki bym dei hok ha ki jingïalehkai jong ka AFC Asian Cup 2027, (Qualifiers Final Round),” la pynpaw kat kum ka kyrwoh jong ka AFC. Kumjuh ka Football Association of Malaysia (FAM) kaba na Kuala Lumpur, ka la shah daiñ kuna ruh haduh $50,000.
Da katei ka jingpyndonkam bakla, ka Vietnam mynta ka la bat ïa ka kyrdan ba hakhlieh duh da kaba ka la kamai 6 poiñ ha katei ka group, kaba pynlong ïa ka Malaysia ba kan ym lah ban ïoh rung sha kawei pat ka wat.
Ka jingïalehkai kaba khatduh jong katei ka group hapdeng ka Vietnam bad ka Malaysia kan long ha ka 31 tarik mynta u bnai, kan ym don jingktah eiei na ka bynta ka jingïaknieh rung.
“Watla katei ka jingïalehkai kam don jingmut shuh na ka bynta ka jingïaknieh rung, hynrei la khmih lynti ba kan long ka jingïakhun kaba itynnad,” la pynpaw ka synjuk ïalehkai jong ka Vietnam.
Kane ka jingjia ka long hadien ka jingtohkit jong ka FIFA halor ka jingpyndonkam jong ka Malaysia da ki nongïalehkai ba la kha nabar ri. Ka jingtohkit ka long halor ka jingjop ïa ka Vietnam da 4-0 kol ha u Jylliew bad ka jingjop pyrshah ïa ka Nepal da 2-0 kol ha u Lber jong u snem ba la lah.
Ka FIFA ka la lap ba ki nongïalehkai ki la ïoh ïa ka jinglong tynrai lyngba ki kot ki sla kiba la thok bad kim don ïa ki kmie ki kpa ne ka jinglong trai shnong na Malaysia. Katkum ka jingpynpaw ka synjuk, lai ngut ki nongïalehkai ki dei kiba wan na Argentina, arngut na Spain, uwei na Nether-lands bad uwei na Brazil.
